Qazaqstanǵa jatyr moıny isigine qarsy jańa ekpe ákelindi
ALMATY. QazAqparat - Qazaqstanǵa jatyr moıny isigine qarsy jańa ekpe ákelindi, dep habarlaıdy QazAqparat tilshisi.
Bul týraly Almatyda ótken Halyqaralyq onkologtar jáne onkogınekologtar kongresinde QR UǴA akademıgi Dılıara Qaıdarova aıtty.
Onyń aıtýynsha, Qazaqstanda shamamen 12 myńǵa jýyq áıel jatyr moıny isigi dıagnozymen esepte tur.
«Áıelder arasyndaǵy qaterli isik derti erlermen salystyrǵanda artyp keledi. Jylyna 4 000 áıel sút bezi qaterli isigine, 1 600 áıel jatyr moıny qaterli isigine shaldyǵady. Naýqastanǵan áıelderdiń 25 paıyzy bala týý jasyndaǵylar. Bul óte qaıǵyly jaǵdaı. Sondyqtan, bul kórsetkishti azaıtý maqsatynda Qazaqstanǵa 9 valentty ekpe engizile bastady. Bul ekpeni kez-kelgen ata-ana 9-12 jastaǵy qyzyna saldyra alady. Ekpe quny 100 AQSh dollaryna teń», - dedi QR DSM bas onkologi Dılıara Qaıdarova.
Mańyzdy sharaǵa AQSh ulttyq qaterli isik ınstıtýtynyń, EURAMA onkologtardyń kásibı qoǵamdastyǵynyń ókilderi keldi. Kongress barysynda Qazaqstandaǵy sút bezi men jatyr moıny qaterli isigin dıagnostıkalaý men emdeýdiń ózekti máseleleri talqylandy.
Aıta ketý kerek keshe kongres aıasynda dúnıejúzine belgili mamandar birneshe áıelge ota jasady. Erteń de Qazaq Onkologııa jáne radıologııa ǵylymı zertteý ınstıtýty bazasynda 4 áıeldiń sút bezine ota jasalady.
Sheberlik sabaǵyna qazaqstandyq onkohırýrgter qatysady.
