Qazaqstanǵa Japonııadan kelgen týrıster qatary 9 myńnan asty

ASTANA. KAZINFORM – Qazaqstan men Japonııa arasyndaǵy týrızm salasyndaǵy yntymaqtastyq qarqyndy damyp keledi.

Ótken jyly elimizge 9 200-den astam japon týrısti kelip, bul kórsetkish 2023 jylmen salystyrǵanda 38%-ǵa artty. Kelýshiler leginiń ósýi qazaqstandyq týrızm ındýstrııasy úshin jańa múmkindikter ashýda.

Tokıo jáne Osaka qalalarynda qazaqstandyq týroperatorlar Japonııanyń iri týrıstik naryq ókilderimen birqatar ekijaqty kezdesý ótkizdi. Skyway, Kompass jáne MLtour kompanııalary ulttyq áýe tasymaldaýshy Air Astana-men birlesip, Qazaqstannyń týrıstik áleýetin HIS, JATA, JTB, Otomo Travel, Tairiku Travel, All Seasons Travel sekildi jetekshi japon kompanııalaryna tanystyrdy.

Kelissózder barysynda japon seriktesterine jańa týrıstik ónimder men baǵyttar usynyldy.

Qazaqstandyq delegatsııa sondaı-aq Osaka qalasynda EKSPO-2025 aıasyndaǵy iskerlik baǵdarlamaǵa qatysty. «Kazakh Tourism» ulttyq kompanııasy QazExpoCongress qoldaýymen japondyq kompanııalar men qazaqstandyq týroperatorlar arasynda B2B kezdesýler uıymdastyrdy. Onyń barysynda Air Astana, «Karavansaray Turkistan» kópfýnktsıonaldy týrıstik kesheni jáne «Open Turkistan» týrıstik aqparattyq ortalyǵy óz jobalaryn usyndy.

– Japon aýdıtorııasy tarapynan elimizge degen qyzyǵýshylyqtyń artqany baıqalady jáne bul eldiń kompanııalarymen yntymaqtastyqty belsendi damytýǵa nıettimiz. Bul – Qazaqstannyń týrıstik áleýetin pash etýge jáne ekijaqty baılanystardy nyǵaıtýǵa baǵyttalǵan mańyzdy qadam. Kazakh Tourism eki eldiń týrızm bıznesi arasynda tıimdi dıalog ornatýǵa septigin tıgizedi, – dedi «Kazakh Tourism» UK» AQ basqarma tóraǵasynyń m.a. Danıel Serjanuly.

Ótkizilgen kezdesýler Japonııa tarapynan Qazaqstanǵa qyzyǵýshylyqtyń artyp otyrǵanyn kórsetti.

Sarapshylardyń pikirinshe, bul baǵytta birlesken jobalardy damytý eki el arasyndaǵy týrıstik aǵyndy odan ári ulǵaıtýǵa múmkindik beredi.

Aıta keteıik, japondyqtar Keln soboryna erekshe syı jasap, stýdentterdiń qylyǵyna keshirim surady.