Qazaqstanǵa janarynda oty, júreginde jalyny bar jastar qajet - N.Nazarbaev

Qazaqstannyń sheteldegi stýdenttik uıymdarynyń I Sleti aıasynda ótken is-sharaǵa QR Prezıdenti N.Nazarbaev óziniń quttyqtaý hatyn joldady. «Biz XX ǵasyrda ata-babalarymyz ańsaǵan armandy júzege asyryp, egemen elimizdi qurdyq. Jańa elordany saldyq. Táýelsizdiktiń 20 jylynda Qazaqstanda júzege asqan irgeli isterdiń bári sender úshin jasalǵanyn árdaıym este ustańdar! Adamzat damýy múldem basqa deńgeıge kóterilgen qazirgi zamanda qasıetti Otanymyzdy odan ári gúldendirý, elimizdi qaryshtap damytý Senderdiń enshilerińe jazyp otyr. Qazaqstandy álemdik kóshtiń aldyna batyl shyǵaratyn Sender bolasyńdar! Qazaqtyń uly aqyny Maǵjan Jumabaev: «Arystandaı aıbatty, jolbarystaı qaıratty, men jastarǵa senemin!», dep jyrlaǵandaı, bizdiń búgingi Otanymyzǵa da dál ózderińdeı janarynda oty, júreginde jalyny bar jastar qajet. Álemniń túkpir-túkpirinde ár túrli bilim ıgerip, sony Qazaqstannyń bolashaǵyna arnaýǵa bel býǵandaryńdy, keýdelerińde «Men óz Otanyma ne bere alamyn?!» degen máńgilik murattyń baryn sezemin. Qaı jerde bolmasyn, barsha qazaq jastaryn elge degen osyndaı ystyq sezim biriktiretin bolsa, Qazaqstannyń juldyzy joǵarydan jarqyraı túspek. Zamana aǵymyn tap basatyn tamasha urpaqtyń tárbıeli isin kórý bizge de zor súıinish. Dál qazir dúbirli doda - London Olımpıadasynda kók baıraǵymyzdyń jelbirep, Ánuranymyzdyń shyrqalýy Qazaqstannyń sporttyq elge aınalǵanyn, básekege qabiletti namysyn tý etken tamasha býynnyń qalyptasqanyn kórsetti. Bolashaq erteń emes, búginnen bastalatynyn bilgenderiń abzal. Tańdap túsken soqpaqtaryń dańǵyl jolǵa aınalsyn! Bolashaqty birge qalaıyq!», - dep jazdy N.Nazarbaev.

Kontsert barysynda Qazaqstannyń sahna juldyzdary óner kórsetti. Al London Olımpıadasynyń chempıony Olga Rypakova men aýyr atlet Almas Óteshevtiń, sondaı-aq «Jaýjúrek myń bala» fılminiń ártisteri men rejısseriniń is-sharaǵa qatysýy jastardyń patrıottyq rýhyn taǵy bir márte asqaqtatty.