Qazaqstanǵa jańa tolqynnyń tehnokrattary kerek - respýblıkalyq basylymdarǵa sholý
***
Elbasynyń Almatyǵa jumys sapary juma kúni Alataý «Aqparattyq tehnologııalar parki» ashyq ekonomıkalyq aımaǵynda ótken «Innovatsııalyq Qazaqstan-2020» atty forýmda jalǵasty. Osyǵan oraı «Egemen Qazaqstan» gazetinde «Qazaqstanǵa jańa tolqynnyń tehnokrattary kerek» degen taqyryppen kólemdi maqala jarııalandy. «Qazaqstan álemdik rynokta óziniń laıyqty ornyn alýy qajet. Ony iske asyrý úshin Prezıdent 4 baǵyt usynyp otyr. Birinshiden, ǵylymı-zertteý bazalary men ınnovatsııalardy basqarý júıesin modernızatsııalaý. Ekinshi - jer qoınaýyn paıdalanýshy iri bıznes pen ulttyq kompanııalardy ınnovatsııalardy qarjylandyrýǵa tartý. Kelesi baǵyt - shaǵyn jáne orta bızneske ınnovatsııalardy damytý úshin jaǵdaı jasaý. Prezıdent tıisti organdarǵa osy máseleni de jiti tapsyrdy. Tórtinshi - «bolashaqtyń ınnovatsııalaryn» damytý», - dep jazady basylym.
«Egemen Qazaqstan» gazetiniń jazýynsha, Memleket basshysy Nursultan Nazarbaev ShYU-ǵa múshe memleketter Syrtqy ister mınıstrlerin qabyldady. Taraptar alda Astanada bolatyn ShYU-ǵa múshe memleketter basshylarynyń mereıtoılyq sammıtin ótkizý máselelerin talqylady. «Kezdesý kezinde Nursultan Nazarbaev ShYU aıasyndaǵy yntymaqtastyqty qaýipsizdik, ekonomıka, gýmanıtarlyq salalarda kúsheıtý qajettigin, munyń uıymdy kelesi onjyldyqta damytýda mańyzdy ról atqaratynyn atap kórsetti. Barlyq mınıstrler Prezıdenttiń ıdeıasymen kelisti. QHR Tóraǵasy Hý Tszıntao ShYU sammıtine qatysatyn sátti, sondaı-aq Prezıdent Nursultan Nazarbaevtyń shaqyrýy boıynsha Qazaqstanǵa óziniń memlekettik sapary ýaqytyn úlken qýanyshpen kútýde», - degen jýrnalısterge arnalǵan brıfıngte QHR Syrtqy ister mınıstri ıAn Tszechı.
***
«Munaıly aýdannyń ortalyǵy Dossorda halyq temir jol qozǵalysyn bógep, jolaýshy jáne júk poıyzyn toqtatyp, ózderiniń áreketine bıliktegilerdiń nazaryn aýdarýdy talap etti. Qarapaıym halyqtyń talaby, ol - Dossordaǵy kúkirt termınalynyń jumysyn dereý arada toqtatý», - dep jazady «Aıqyn» gazeti búgingi nómirindegi «Kúkirttiń «kesirinen» kelisimshart buzyldy» degen maqalasynda. Basylymnyń atap ótýinshe, júzdegen dossorlyq turǵynnyń temirjol qozǵalysyn tejep, narazylyq bildirýine «Dossor protsessıng kompanı» JShS-niń temirjol tuıyǵyna 16 vagon Teńiz kenishindegi kúkirtti jetkizýi sebep bolǵan.
«Aıqyn» gazetiniń jazýynsha, ótken jyldyń merzimimen salystyrǵanda Qazaqstanda qańtar-sáýir aılarynda azyq-túlik ónimderi 7,1 paıyzǵa, al kókónis-jemis ónimderi 17 paıyzǵa qymbattaǵan. Statıstıkalyq málimetterge qaraǵanda, jyl basynan beri ınflıatsııa 4,2 paıyzdy quraǵan, onyń ishinde azyq-túlik taýarlaryna ınflıatsııa 7,1 paıyz boldy. Negizinen alǵanda, kókónis pen jemis-jıdek, qant, maı, jumyrtqa qymbattapty. Bul jaıynda basylymnyń senbilik sanyndaǵy «Azyq-túlik qymbattap barady» degen maqalada egjeı-tegjeıli baıandalǵan.
***
Osydan týra bir aı buryn Qaıym Muhamedjanov turǵan úı qabyrǵasyna qoıylǵan eskertkish-taqtany belgisiz bireýler jóndeýge kelmesteı etken edi. Endi qaskóıler abaıtanýshy ǵalym jerlengen beıitti búldirip ketipti. «Alash aınasy» gazetiniń búgingi nómirinde «Ǵalym Qaıymnyń qabirin qıratqan kimder?» degen taqyryptaǵy maqalaǵa osy másele arqaý bolǵan. «Bul - uly tulǵaǵa qarsy baǵyttalyp, ádeıi jasalǵan kezekti vandalızm!», - deıdi ǵalymnyń uly Qanaǵat Muhamedjanov.
Osy basylymnyń turaqty «Dat!» aıdarynda Qazaqstannyń eńbek sińirgen qaıratkeri, ánshi Sáýle Janpeıisovamen aradaǵy suhbat «Dástúrli mýzykaǵa aýyldyń, ózimizdiń qazaqtyń qarabaıyr dúnıesi ǵoı dep qaraıtyn toqmeıilsý bar» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Ulttyǵymyzdyń sımvoly ulttyq mýzykamyzdy dáripteıtin dástúrli óner ortalyqtaryn ashý kerek. Onyń ishinde baǵalanbaı el-elde júrgen qolónershiler, sheberler, aıtyskerler jınalsa. Ulttyq ónerimizge qatysty dúnıeniń barlyǵy sol jerden tabylsa, oblystardan, aýdandardan ashylsa, dástúrli ánshi, kúıshilerge jumys tabylar edi», - deıdi.
***
«Keshe Memleket basshysy Nursultan Nazarbaev Almatydaǵy rezıdentsııasynda Reseı Federatsııasynyń Syrtqy ister mınıstri Sergeı Lavrovty qabyldady», - dep jazady «Kazahstanskaıa pravda» gazeti. Basylymnyń atap óýtinshe, kezdesýde ekijaqty qarym-qatynastardy damytýǵa, sondaı-aq alda Astanada ótetin ShYU-ǵa múshe memleketter basshylary mereıtoılyq sammıtine qatysty máselelerdiń keń aýqymy talqylandy. «Biz Astanada 15 maýsymda ótetin joǵary deńgeıdegi kezdesýge jaqsy daıyndalý úshin erteń osy tolaıym kún tártibin júzege asyrýǵa umtylatyn bolamyz», - dedi jýrnalısterge arnalǵan brıfıngte S.Lavrov.
