Qazaqstanǵa jańa lokomotıvter qaıdan jetkiziledi
ASTANA. KAZINFORM - QR Kólik mınıstrligi elimizde jolaýshylar vagondary men lokomotıv tapshylyǵy qalaı sheshilip jatqany jaıynda túsinik berdi.

Qazirgi kezde parkte 1807 lokomotıv bar, olardyń tozýy deńgeıi 61% shamasynda.
- Lokomotıvter parkiniń tozýyn azaıtý jáne jańartý maqsatynda 2024 jyly 185-i satyp alyndy, sonyń 44-i elektrovoz jáne 141-i teplovoz, onyń ishinde 20-sy manevrlik teplovoz. Al 2025 jyly 200 lokomotıv satyp alý josparlanǵan. Lokomotıvter LKZ (Wabtec), EKZ (Alstom), CRRC (QHR) zaýyttarynda jasalynady. 2024 jyly Qytaı óndirisiniń 200 teplovozyn jetkizýge kelisimshart jasaldy (CRRC), onyń ishinde 100 manevrlik jáne 100 magıstraldy teplovoz qamtylǵan. Osy kelisim aıasynda 2025 jyly 94 jáne 2026 jyly 36-syn jetkizý eskerilgen, - delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, 2023 jyly «QTJ-JT» JShS men «Brıansk mashına jasaý zaýyty» basqarýshy kompanııasy» AQ arasynda 2TE25KM serııaly sertıfıkattalǵan 50 magıstraldyq teplovoz satyp alýǵa shart jasaldy, olar tolyq kólemde jetkizildi.
- Qazirgi kezde jolaýshylar vagondaryny sany 2 667-ge jetti, tozýy deńgeıi – 44 paıyz. 2023 jyly 118 jolaýshylar vagony satyp alyndy, onyń ishinde 11 vagon múgedektigi bar adamdarǵa arnalǵan. 2024 jyly 143 vagon satyp alyndy, sonyń arasynda jeteýi múgedektigi bar adamdarǵa qolaıly etip jasalǵan. Sonymen qatar, «ZIKSTO» AQ-men 157 vagon satyp alýǵa kelisimshart jasaldy, onyń ishinde 14 vagonnyń arnaıy kýpesi bar, - dep atalyp ótken mınıstrlik málimetinde.
Eske salsaq, jaqynda «Qazaqstan temir joly» ulttyq kompanııasy elimizde jolaýshylar vagondary men lokomotıv tapshylyǵy qalaı sheshilip jatqany boıynsha aqparat berdi.