Qazaqstanǵa jalǵan qujatpen ákelingen asyl tuqymdy sıyrlar anyqtaldy

NUR-SULTAN. QazAqparat - Qazaqstanǵa jalǵan qujattar arqyly slovakııalyq dep chehııalyq 50 bas asyl tuqymdy iri qara mal kirgizilmek bolǵan, dep habarlaıdy QazAqparat QR AShM saıtyna silteme jasap.

Aıta ketsek, byltyrdan beri Qazaqstanǵa Cheh Respýblıkasynan aýyl sharýashylyq janýarlaryn (tirideı) kirgizýge ýaqytsha shekteý qoıylǵan. Zańdy buzǵan kásipkerlerge iri qarany jóneltýshi elge qaıta qaıtarý týraly nusqaý berildi.

QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti «Agro-Kompleks-Sýlyshok» kompanııasyna Slovakııadan 50 bas asyl tuqymdy iri qara malyn (SEVITA s.r.o. -júk jóneltýshi) ımporttaýǵa veterınarlyq ruqsat bergen bolatyn.
«Alaıda qujattardy, onyń ishinde 2019 jylǵy 8 qazandaǵy SVS /2019/120824- J veterınarlyq sertıfıkatyn tekserý barysynda janýarlardyń shyqqan eli Cheh Respýblıkasy ekeni anyqtaldy. Al, Cheh Respýblıkasynyń ýákiletti organdary birneshe ret jalǵan veterınarııalyq sertıfıkattar men kýálikter berý arqyly qarapaıym janýarlardy «asyl tuqymdy» mal retinde eksporttaý faktileri tirkelgen bolatyn. Atalmysh jaǵdaı boıynsha qazirgi ýaqytta sot protsesteri ótýde», delingen habarlamada.
Cheh Respýblıkasynan janýarlardy ákelýge shekteý qoıylýyna baılanysty QR AShM Veterınarııalyq baqylaý jáne qadaǵalaý komıtetiniń Soltústik Qazaqstan oblystyq aýmaqtyq ınspektsııasy «Agro-Kompleks-Sýlyshok» JShS basshylyǵyna janýarlardy jóneltýshi elge qaıta qaıtarý qajettiligi týraly nusqaý berdi.