Qazaqstanǵa jalǵan dollar men evro kirgizýmen aınalysqan qylmystyq top quryqtaldy
Bul týraly QazAqparat QR Ulttyq qaýipsizdik komıtetiniń baspasóz qyzmetine silteme jasap habarlaıdy.
Baspasóz qyzmetiniń habarlaýynsha, UQK jáne prokýratýra organdary birlesip júrgizgen arnaıy operatsııa barysynda Qyzylorda, Almaty jáne Óskemen qalalarynda Qazaqstan, Ázerbaıjan jáne Grýzııa azamattarynan turatyn qylmystyq top músheleri quryqtaldy.
Tergeý barysynda olardyń asa úlken kólemde joǵary sapasymen erekshelenetin jalǵan AQSh dollaryn jáne evrony Qazaqstan aýmaǵyna ákelýge jáne ótkizýge qatysy barlyǵy dáleldendi.
Valıýta Túrkııadan Qazaqstanǵa poshta arqyly jasyrylǵan kúıde jóneltilip otyrǵan.
Qyzylorda oblysynyń Mamandandyrylǵan aýdanaralyq qylmystyq sotynyń sheshimimen top basshylary men músheleri transulttyq uıymdasqan qylmystyq topty qurǵandary jáne oǵan qatysqandary, sonymen qatar jalǵan aqshany ótkizgenderi úshin kináli dep tanyldy.
«Kináli azamattar 9 jyldan bastap 17 jylǵa deıin uzaq merzimge bas bostandyqtarynan aıyrý jazasyna kesildi. Qoldanylǵan sharalar elimizdiń ekonomıkalyq áleýetine keltiretin zalaldy joıýǵa jáne qylmystyq ahýaldy jaqsartýǵa tıimdi áser etti»,-delingen UQK baspasóz qyzmeti taratqan aqparatta.
Foto:gov.kz
