Qazaqstanǵa jaqsy ónimder ákelip, qyzmet sapasyn arttyrýǵa daıynbyz – Ý I
ASTANA. KAZINFORM – 29 mamyrda Astanada ótken Qytaı – Ortalyq Azııa medıaforýmy aıasynda Qytaıdyń Genertec International Holding Co., Ltd kompanııasy bas dırektorynyń orynbasary Ý I Kazinform tilshisine suhbat berip, Qytaı men Qazaqstan arasyndaǵy avtoónerkásip salasyndaǵy yntymaqtastyq týraly aıtty.
– Keıingi jyldary eki el úkimetiniń qoldaýymen avtoónerkásip salasyndaǵy yntymaqtastyǵymyz artyp keledi. Biz birlesip avtomobıl qurastyrý, satý jelisin damytý, tehnıkalyq oqytý sııaqty baǵyttarda eleýli nátıjelerge qol jetkizdik. Máselen, Allur kompanııasynyń tolyqtaı qurastyrylǵan avtokólikteriniń jyldyq óndirisi 2019 jyly 9 500 birlikten bastalsa, búginde ol kórsetkish 100 myńǵa jýyqtady. Bul – ekijaqty tıimdi yntymaqtastyqtyń aıqyn nátıjesi, - dedi ol.
Óz kezeginde Ý I bolashaqtaǵy maqsat-josparlarymen bólisti.
– Keleshekte biz jergilikti brendterdiń qalyptasýyn qoldaı otyryp, jańa energetıka baǵytyndaǵy jahandyq úrdisterge de beıimdelýimiz kerek, - dedi Qytaıdyń Genertec International Holding Co., Ltd kompanııasy bas dırektorynyń orynbasary.
Ol Allur kompanııasymen birlesken jobalarǵa da toqtaldy.
– Biz tehnıkalyq oqytý men basqarý jabdyqtaryn jetildirý arqyly Allur kompanııasynyń kásibı óndiristik áleýetin arttyrýǵa atsalysýdamyz. Bul – Qytaı tarapynyń belsendi qoldaýy men Qazaqstan Úkimetiniń jan-jaqty kómeginiń nátıjesi, - dedi Ý I.
Sonymen qatar ol Allur-dy Qazaqstandaǵy eń qundy ulttyq brendterdiń birine aınaldyrý jolynda birlese jumys isteıtinin jetkizdi.
– Biz zarıadtaý stantsııalary men tıisti ınfraqurylymdy damytýda da múmkindigimizdi paıdalanǵymyz keledi. Qazaqstanǵa jaqsy ónimder ákelip, qyzmet sapasyn arttyrýǵa, Allur-dy eldegi eń qundy ulttyq brendterdiń birine aınaldyrýǵa bar kúshimizdi salamyz, - dep túıindedi Ý I.
Eske sala keteıik, buǵan deıin «Qytaı – Ortalyq Azııa» medıa forýmy aıasynda «Qazaqstan–Azııa saýda jáne mádenıetti damytý qaýymdastyǵy» Basqarma tóraǵasy Qanat Beısek Kazinform tilshisine bergen suhbat berdi. Onda ol kúrdeli ári tez ózgerip jatqan aqparat dáýirinde buqaralyq aqparat quraldarynyń mańyzyna toqtalǵan bolatyn.