Qazaqstanǵa zańsyz kirgizilgen avtokólikter tekseriledi

ASTANA. KAZINFORM – Búgin Parlament Májilisiniń jalpy otyrysynda Májilis depýtaty Erlan Saırov Qazaqstanǵa zańsyz kirgizilip jatqan kólikterge qatysty másele kóterdi.

- Ózimizdiń ishki naryqty shetelden kelgen ártúrli qoqystan qorǵaý kerek dep oılaımyn. Túrli aqparat boıynsha qazir bizdiń Eýrazııalyq ekonomıkalyq odaq memleketterinen Qazaqstanǵa úshinshi elden kontrabandamen jetkiziletin avtomobılder kirip jatyr. Qazaqstanǵa oń róldi avtokólikterdi kirgizýge tyıym salynǵan. Degenmen, eki jyl ishinde elimizge 56 myń avtomobıl jetkizilgen jáne odan Qazaqstanǵa 70 mlrd teńge zalal keldi degen aqparat bar. Taǵy bir beıresmı málimetke súıensek, kórshilerimiz arqyly elimizge Japonııadan oń róldi avtokólikter bólshek retinde kirip, Qazaqstanda qaıtadan qurastyrylyp, oǵan osynda jańa qujattar daıyndalady. Budan qomaqty zalal keledi degen pikir aıtylyp otyr. Osy jóninde Úkimet bile me?, - dep surady E. Saırov.

Óz kezeginde Premer-mınıstrdiń orynbasary – Ulttyq ekonomıka mınıstri Serik Jumanǵarın osy jóninde tıisti tekserý jasaýǵa tapsyrma berýge daıyn ekenin aıtty.

- Jalpy aıtqanda, ondaıdy estigenimiz bar. Bólshek retinde ákelip, osynda konstrýktor etip jınaıtyny aıtyldy. Biraq 56 myń kólik degen óte kóp jáne ondaı derekti estigen joqpyz. Osynshama kólik kirgizilse, kórinetin edi. Sizdiń málimetterdi eskerip, ókiletti organdarǵa tapsyrma beremiz. Olar tekseredi, - dedi Úkimet basshysynyń orynbasary.

Aıta keteıik, búgin Májilis Eýrazııalyq ekonomıkalyq odaqtyń Keden kodeksi týraly shartqa elektrondyq saýdany retteý baǵytynda ózgerister engizetin hattamasyn ratıfıkatsııalaý týraly zańdy qabyldady.