Qazaqstanǵa World Business Consulting qarjy pıramıdasy isi boıynsha kúdikti ekstradıtsııalandy
ASTANA. KAZINFORM — QMA Astana boıynsha departamenti World Business Consulting qarjy pıramıdasynyń qurylymdyq bólimshesin qurý jáne oǵan basshylyq etý faktisi boıynsha tergep-tekserýdi aıaqtady.
Tergeý amaldaryna saı, 2020 jyly kúdikti azamattardyń qarajatyn joǵary tabys ákeletin ınvestıtsııalyq baǵdarlamalarǵa qatysý syltaýymen tartqan.
Alaıda kompanııanyń tıisti lıtsenzııasy bolmaǵan jáne is júzinde ınvestıtsııalyq qyzmetpen aınalyspaǵan.
— Qarajat qolma-qol túrde qabyldanyp, býhgalterlik qujattarmen rásimdelmegen. Zańdy qyzmettiń kórinisin qalyptastyrý maqsatynda salymshylarǵa onlaın-platformada jeke kabınetter ashylyp, onda jalǵan «tabys» kórsetkishteri beınelengen. Túsken qarajat qarjy pıramıdasyna tán qaǵıda boıynsha qaıta bólinip otyrǵan, ıaǵnı buryn tartylǵan qatysýshylarǵa tólemder jańa salymshylardyń esebinen júrgizilgen, — delingen habarlamada.
Jańa qatysýshylardy tartý úshin tanystyrylymdar men úgit-nasıhat is-sharalary uıymdastyrylyp, sondaı-aq BAÁ men Túrkııaǵa saparlar ótkizilgen.
Ýaqtyly qabyldanǵan sharalardyń nátıjesinde zańsyz shema bastapqy kezeńinde toqtatyldy. 2024 jyly kúdiktige halyqaralyq izdeý jarııalanyp, sottyń sanktsııasymen syrttaı qamaýǵa alý túrindegi bultartpaý sharasy qoldanylǵan.
2026 jylǵy qańtarda ol Grýzııa aýmaǵynda ustalyp, Qazaqstanǵa ekstradıtsııalandy. Sot sanktsııasymen kúdiktiniń jer ýchaskesine tyıym salyndy.
Qylmystyq is sotqa joldandy. QR QPK-niń 201-babyna sáıkes ózge aqparat jarııa etilmeıdi.
Aıta ketý kerek, jyl basynan beri Agenttik 15 qarjy pıramıdasynyń qyzmetin toqtatty. Jábirlenýshilerge keltirilgen zalaldy óteý maqsatynda uıymdastyrýshylardyń jalpy quny 662 mln teńgeni quraıtyn múlkine tyıym salyndy.
Áleýmettik jelilerdegi 25 myńnan astam qatysýshysy bar 22 chattyń jumysy aldyn alý maqsatynda buǵattaldy.
«Kıbernadzor» júıesi arqyly zańsyz kontent belgileri bar 1,1 myń saıt pen akkaýnt buǵattaldy.
Eske salaıyq, buǵan deıin Qazaqstan Bas prokýratýrasy men Іshki ister mınıstrligi Interpolynyń qyzmetkerleri Qazaqstannyń Polsha Respýblıkasyndaǵy Elshiliginiń járdemdesýimen transulttyq qylmystyq topty basqarǵan kúdiktini ekstradıtsııalaǵanyn habarlaǵanbyz.
