Qazaqstanǵa vıza alý úshin kezekke turǵan qandastarymyz eki saǵatta 15 myńǵa jaqyndady
ASTANA.QazAqparat - Qytaıdaǵy qandastarymyzdyń vıza kezegine arnalǵan kezek.cn saıty 6 sáýir kúni mamyr-maýsym aıynyń vıza kezegin taratty. Oǵan sáıkes, eki saǵatta 15 myńǵa jýyq adam eki aıdyń vıza kezegine turyp úlgergen, dep habarlaıdy QazAqparat.
hazharas.com saıtynyń habarlaýynsha, ár eki aıdyń vıza kezegin bekitetin «kezek» júıesine 1 júmys kúninde 350 adamnyń tirkelýine múmkindik bar. Búgin mamyr-maýsym aıynyń 42 júmys kúnine 14700 adamǵa vıza kezegi berildi. 4 jáne 5 sáýir kúni «kezek» júıesiniń uıaly telefonǵa arnalǵan nusqasy synaqtan ótkizilip, 700 adam bir saǵatqa jetpeı kezekke turyp bolǵan. Al 6 sáýir kezek saıty dástúr boıynsha eki aıdyń vıza kezegi týraly málimetti taratyp, 14 myń adam eki saǵatqa jetpeı tirkelip boldy. Budan bólek Astanadaǵy Ekspo kórmesin tamashalaýǵa nıettenip otyrǵan taǵy qanshama qandastarymyz vıza kezeginen oryn ala almaǵan.
Aıta keterligi, Qytaıdaǵy qandastarymyzdyń Qazaqstanǵa vıza rásimdeýdegi qıyndyqtardy jeńildetý úshin, Úrimji Qalasyndaǵy QR SІM Tólqujat-vıza qyzmetiniń qoldaýymen Úrimji qalasyndaǵy Qazaq jastary ınternettik saıt arqyly kezekke tirkeý júıesin 2015 jyly naýryz aıynan bastap iske qosqan. Osydan keıin tólqujat-vıza qyzmeti esigi aldyndaǵy uzynnan uzaqqa sozylǵan kezek azaıǵan.
