Qazaqstanǵa ushyp kelgen jolaýshylardyń 98 paıyzynda PTR-test anyqtamasy boldy – Baıǵabylov
NUR-SULTAN. QazAqparat – Kóliktegi bas sanıtarlyq dáriger Sádýaqas Baıǵabylov 29 qazan kúni túnde 10 halyqaralyq áýe reısimen elge 1072 jolaýshy ushyp kelgenin málim etti. Olardyń 1047-de PTR-test anyqtamasy bolǵan, dep habarlaıdy QazAqparat tilshisi.
«Nur-Sultandaǵy 4 reıs boıynsha 426 jolaýshynyń 418-de, Almatydaǵy 4 reıs boıynsha 536 jolaýshynyń 522-de, Qaraǵandydaǵy 1 reıs boıynsha 16 jolaýshynyń bárinde, Shymkentke ushyp kelgen 94 jolaýshynyń (1 reıs) 91-de PTR-test anyqtamasy bar bolyp shyqty», - dep habarlaıdy Sádýaqas Baıǵabylov.
PTR-test anyqtamasy joq azamattar Nur-Sultan, Almaty men Shymkent qalalaryndaǵy karantındik statsıonarǵa jatqyzylǵan. Jolaýshylar halyqaralyq áýe reısterimen Túrkııa, Reseı, BAÁ elderinen kelgen.
Sonymen qatar Sádýaqas Baıǵabylov Túrkııadan kelgen Tájikstan azamaty PTR-test anyqtamasy bolmaǵandyqtan Almaty áýejaıynan deportatsııalanǵanyn jetkizdi.
