Qazaqstanǵa úsh atom elektr stansasyn salý kerek - Prezıdent

BÝRABAI. KAZINFORM – Qazaqstanda tolyqqandy ıadrolyq klaster qalyptastyrý qajet. Bul týraly Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev málim etti.

– Azamattarymyz referendýmda birinshi atom elektr stansasyn salý týraly sheshimge qoldaý kórsetip, osy mindetti oryndaýǵa jol ashyp berdi. Bul qadam alys bolashaqtaǵy ahýal qalaı bolatynyn eskere otyryp, energetıka salasyn keshendi túrde, jan-jaqty oılastyryp damytý qajettigin kórsetedi. Másele elimizdiń energııaǵa degen qazirgi suranysyn qanaǵattandyrýǵa ǵana tirelip turǵan joq. Biz úshin el ekonomıkasynyń ondaǵan jyl boıy qarqyndy damýyna berik negiz bolatyn jańa energetıka salasyn qalyptastyrýdyń strategııalyq mańyzy bar. Men, dál sol sebepti, Qazaqstanǵa bir emes, úsh atom elektr stansasyn salyp, aqyrynda tolyqqandy ıadrolyq klaster qalyptastyrý qajet dep esepteımin, - dedi Qasym-Jomart Toqaev.

Budan buryn habarlanǵandaı, Prezıdent qoǵamda qyzý talqylanyp jatqan salyq reformasyna qatysty pikirin aıtty.