Qazaqstanǵa urlanǵan kóliktiń qandaı markalary jıi ákelinedi

Qylmyskerler urlanǵan kólikterdi kóbine Reseıden Qazaqstanǵa kirgizýge tyrysady. Bul týraly QR Іshki ister mınıstrliginen málim etti, dep habarlaıdy QazAqparat tilshisi.

«Elimizdiń aýmaǵyna zańsyz kirgizilgen kólikterdiń kóbisi Reseı Federatsııasynyń aýmaǵynda urlanǵany anyqtaldy. Statıstıkalyq málimetterge sáıkes, eń kóp urlanatyn kólik markalary Reseıde óndirilgen avtomobılderge qatysty. Sonymen qatar, Toyota, Mazda, Hyundai, Audi markalary da jıi urlanady», - delingen Іshki ister mınıstrliginiń QazAqparat agenttigine bergen jaýabynda.

Osy oraıda vedomstvo mamandary satyp alatyn avtokólikti tıisti tekserýden ótkizý kerek ekenin túsindirdi.

«Eski avtokólikti (Qazaqstan Respýblıkasynda tirkelgen) satyp alý kezinde negizgi qujattardyń bar ekenine jáne olardyń túpnusqa ekenine kóz jetkizý kerek. Budan keıin kólikti egjeı-tegjeıli tekserý kerek. Tekserýdi arnaýly tehnıkalyq qyzmet kórsetý stantsııasynda júrgizgen jón. Onda olar qujatta jáne avtokóliktiń ózinde kórsetilgen nómirlengen tetikterdiń sáıkestigin teksere alady. Sonymen qatar, mamandandyrylǵan halyqqa qyzmet kórsetý ortalyǵynda kólikti qaıta tirkeý kezinde salyq pen aıyppul boıynsha qaryzdyń bar-joǵyn, izdeýde turýy múmkindigin tekserýge bolady», - dep atalyp ótken vedomstvo aqparatynda.