Qazaqstanǵa Ulybrıtanııanyń úzdik dárigerleri keldi

QR DSM Pedıatrııa jáne balalar hırýrgııasy ǵylymı ortalyǵy málimetinshe, shara aıasynda Ulybrıtanııanyń aldyńǵy qatarly aýrýhanalarynyń gendik aýrýlardy emdeý boıynsha eń myqty dárigerleri respýblıkanyń ár túkpirinen kelgen 100-den astam dárigerlerge mýkovıstsıdoz aýrýyn emdeý men  dıagnostıkalaý boıynsha semınar ótkizýde. Atap aıtqanda, Greıt Ormond-strıt jáne  Brompton Koroldyq aýrýhanalarynyń jetekshi dárigerleri Ien Balfýr-Lın, Ammanı Prasad, Sıýzan Medj, Mılan Matsek, Sıýzı Kennı  jáne Dúnıejúzilik mýkovıstsıdoz uıymynyń Prezıdenti  Terrı Stıýart myrzanyń ózi kelgen. Sheteldik mamandar eki kún boıy ótetin semınarda gendik aýrýlardy emdeý oıynsha álemdik tájirıbelerimen bólisip, mýkovıstsıdozdy dıagnostıkalaý men emdeýdiń zamanaýı jáne ınnovatsııalyq tásilderin usynady. Sonymen qatar,  mýkovıstsıdozǵa shaldyqqan balalardy durys kútý men  tamaqtaný boıynsha keńester beredi. Biliktilikti arttyrý maqsatynda ótip jatqan semınarǵa pedıatrııalyq qyzmettiń 100-den astam dárigerleri:  pýlmonologtar, dıetologtar, gastroenterologtar, sonymen qatar, Qazaqstan respýblıkasynyń barlyq aımaqtarynan sırek (orfandyq) aýrýlar boıynsha óńirlik úılestirýshiler men medıtsınalyq JOO stýdentteri qatysýda.

«Búgingi shara Qazaqstan Respýblıkasynda balalardaǵy sırek aýrýlardy dıagnostıkalaý men emdeýdiń jańa standarttaryn engizýge arnalǵan Jol kartasy aıasynda ótkizilip otyr. Búgingi kúni Qazaqstanda resmı túrde mýkovıstsıdozǵa shaldyqqan 105 naýqas tirkelgen. Ár bala sapaly em alyp, uzaq ómir súrýge quqyly. Sharany ótkizýdegi basty maqsatymyz QR dárigerleriniń biliktiligin arttyra otyra, medıtsınalyq qoǵamdastyqty mýkovıstsıdoz máselelerine nazar aýdartý», - deıdi «Mýkovıstsıdozben aýyratyn múgedek balalar» QB qazaqstandyq mýkovıstsıdoz qaýymdastyǵy Indıra Izbasarova.

Onyń aıtýynsha, gendik aýrýǵa shaldyqqan  naýqastardy emdeý búkil álemde erekshe qymbat jáne álemniń barlyq damyǵan elderinde arnaıy Memlekettik baǵdarlamalarmen qamtamasyz etiledi.

Sharanyń ashylýynda QR Densaýlyq saqtaý mınıstrliginiń medıtsınalyq kómek kórsetýdi uıymdastyrý jónindegi dırektor orynbasary Gúlnar Janǵarasheva: «Densaýlyq saqtaý mınıstrligi sońǵy jyldary mýkovıstsıdoz, birinshilikti ımýntapshylyǵy, týabitti qan uıýy buzylysy, Dıýshen mıopatııasy syndy sırek aýrýlarǵa erekshe nazar aýdaryp, mán berýde. 2017 jyldan beri Qazaqstanda balalardaǵy sırek aýrýlardy dıagnostıkalaý men emdeýdiń jańa standarttaryn engizýge arnalǵan Jol kartasy iske asýda. Jol kartasy aıasynda dıagnostıkalaýdyń klınıkalyq hattamalary, naýqastardyń emdelý joldary qarastyrylýda jáne emdeý men dıagnostıkalaý jetildirilýde. Ár oblys ortalyqtarynda orfandyq aýrýlar boıynsha úılestirýshiler bar. Olar respýblıkalyq ortalyqtarmen birige otyryp patsıentterge medıtsınalyq kómek beredi. Elimizde mýkovıstsıdozben aýyratyn balalar tegin emdelip, tegin dári-dármekpen qamtamasyz etiledi. Dıagnostıkalaý, aýrýdy anyqtaý jyldan-jylǵa jaqsaryp keledi. Búgingi basqosý sırek aýrýlardy erte anyqtaý, aldyn-alý, gendik aýrýǵa shaldyqqan balalardyń ómir súrý sapasy men ómir súrýin uzartý syndy ózekti máselelerdiń aldyn-alýǵa jáne odan ári jaqsartýǵa, sonymen qatar, dárigerlerdiń biliktilikterin arttyrýǵa úlken septigin tıgizeri sózsiz dep bilemin», - dedi.

Aıta keteıik, shara aıasynda 26 sáýir kúni  sheteldik qonaqtar QR DSM Pedıatrııa jáne balalar hırýrgııasy ǵylymı ortalyǵynyń tynys-tirshiligimen tanysyp, sırek aýrýlarǵa shaldyqqan balalardyń ata-analarymen kezdesedi..

Mýkovıstsıdoz - tynys alý jáne as qorytý júıelerin zaqymdaıtyn, deneni mýtatsııaǵa ushyratatyn aýyr genetıkalyq aýrý.