Qazaqstanǵa ýaqytsha keletin sheteldikter JSN-di bir saǵatta ala alady
ASTANA. QazAqparat - QR ІІM Kóshi-qon qyzmeti komıteti tóraǵasynyń orynbasary Galına Sársenbaeva Qazaqstanǵa ýaqytsha keletin sheteldikter qujatyn rásimdeýdiń jeńildetilgen rejimi týraly aıtyp berdi, dep habarlaıdy QazAqparat.
«Kelesi jyldan bastap kórsetiletin jańa qyzmetterge toqtalǵym keledi. Kelesi jyldan bastap biz ýaqytsha keletin sheteldikterge jeke sáıkestendirý nómirin (JSN) resimdeıtin bolamyz. JSN olarǵa elimizde bıznes júrgizý, kelisimder men salyq tóleý úshin qajet», - dep toqtaldy G. Sársenova Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, buryn sheteldikter JSN alý úshin salyq organdaryna júginetin, JSN-di qalyptastyrý 5 kúnge deıin sozylatyn.
«Biz atalǵan qyzmet bir saǵattyń ishinde iske asyrylady dep josparlap otyrmyz. Qazirgi kezde Іshki ister mınıstrligi men halyqqa qyzmet kórsetý ortalyqtarynyń aqparattyq júıesi jetildirilip jatyr. Jańa jyldan bastap bul jumysqa tolyqtaı kirisemiz», - dep naqtylady ol.
Sonymen qatar ol HQKO-da jalpy kóshi-qon polıtsııasy jelisi boıynsha 11 qyzmet kórsetiletinin jetkizdi.
«Jáne bul tizim udaıy keńeıýde. Sońǵy 2 jyl ishinde biz HQKO arqyly 4 memlekettik qyzmetti qosymsha kórsete bastadyq. Olardyń qatarynda: shetelge turǵylyqty turý úshin shyǵý qujattaryn resimdeý, shetelge birge ata-anasymen shyǵý úshin balalardyń fotosýretterin ata-anasynyń pasportyna jabystyrý, eńbek mıgranttaryna ruqsat berý jáne ony uzartý, Qazaqstanda turǵylyqty turatyn sheteldiktiń yqtııarhatyn jáne azamattyǵy joq adamnyń kýáligin berý qamtylǵan», - dedi G. Sársenova.
Bul turǵyda Qazaqstanda turaqty turatyn sheteldikter Qazaqstandaǵy turǵylyqty jerin aýystyrǵan jaǵdaıda HQKO-ǵa baryp, qyzmet alatynyn bilý mańyzdy. Buǵan deıin sheteldik basqa óńirge kóshken kezde kóshi-qon qyzmetinen arnaıy ruqsat alýy qajet bolatyn. Odan keıin kóship ketken soń basqa óńirde tirkelýi kerek. Bunyń barlyǵy birneshe kúndi qajet etetin. Endi burynǵy mekenjaıdan shyǵý avtomatty túrde júrgiziledi, ıaǵnı jańa turǵylyqty jeri boıynsha halyqqa qyzmet kórsetý ortalyǵyna barý jetkilikti.
