Qazaqstanǵa tyıym salynǵan taýarlardy ákelgenderge qansha aıyppul salyndy

ASTANA. QazAqparat - Jyldyń basynan beri úshinshi eldermen shekaradaǵy (EAEO-ǵa kirmeıtin elder) ótkizý pýnkteri keden operatsııasy kezinde tyıym salynǵan taýarlardy ákelip-áketýdiń 410 faktisin anyqtady, dep habarlaıdy QazAqparat.

Onyń ishinde:

- 153 jaǵdaıda jalpy salmaǵy 50,4 tonna bolatyn munaı ónimderi anyqtalyp, zań buzýshylarǵa 7,9 mln teńge aıyppul salyndy, taýar memleket paıdasyna óndirildi;

- 28 jaǵdaıda jalpy salmaǵy 33,7 tonna bolatyn balalar oıynshyqtary anyqtaldy, taýarlardy memleket paıdasyna óndirýsiz 1,3 mln teńge aıyppul salyndy;

- 96 jaǵdaıda ártúrli taýar toptary boıynsha ruqsat qujattaryn usyný tártibin buzýǵa qatysty (jýǵysh zattar, motor maılary, paıdalanylǵan shınalar jáne basqa da taýarlar) 6,6 mln teńge somasyna aıyppul salyndy.

- 133 jaǵdaıda 2,5 mln AQSh dollaryna balamaly somaǵa qolma-qol shetel valıýtasyn áketýdiń jáne 41,2 mln teńge somaǵa salmaǵy 1,5 kg altyn quımany áketý boıynsha memleket paıdasyna óndirýsiz 6,9 mln teńgege aıyppul salyndy.

Bul faktiler salyq tóleýshilerdiń Qazaqstan shekarasy arqyly taýar tasymaldaý talaptaryn buzýǵa tyrysqanyn kórsetedi.

Buǵan Memlekettik kirister komıtetiniń aýmaqtyq bólimshe qyzmetkerleri jol bermegen.