Qazaqstanǵa týrısterdi tartý úshin ekspedıtsııa uıymdastyrylady
ALMATY. QazAqparat - Almatyda Almaty Travel Fest 2019 saıahatshylar festıvali ótti. Jıyn barysynda «Kazakh Tourism» Ulttyq kompanııasy AQ basqarma tóraǵasynyń orynbasary Tımýr Dúısenǵalıev sheteldik týrısterdi tartýǵa múmkindik beretin ekspedıtsııa uıymdastyrýǵa usynys aıtty, dep habarlaıdy QazAqparat tilshisi.
«Byltyr biz Almaty, ShQO, Túrkistan oblystarynda saıahattadyq. Tıan-Shan men Jońǵar Alataýynyń sýretteýge til jetpeıtin tumsa sulýlyǵyn tamashaladyq. Jońǵar Alataýy - Klondaık sııaqty adam aıaǵy baspaǵan jerler bar. Saryarqada da - kıeli jer kóp. Bizdiń basty maqsatymyz osy marshrýttardy nasıhattaý. Ońtústik Qazaqstandaǵy Saıram Ógem ulttyq parkinde taý týrızmin damytýǵa bolady», - dedi Tımýr Dúısenǵalıev.
Onyń aıtýynsha, bıyldyń ózinde týrıstik sala ókilderin 4 ekspedıtsııa kútip tur. Birinshi halyqaralyq «Shyǵys tranzıti» belgili geograf Semenov Tıan-Shanskııdiń izimen ótpek.
Ekinshi ekspedıtsııa Qytaı monahy Sıýantszan jolymen bolady.
«Jibek joly - suhbat joly» ekspedıtsııasy Qytaı, Qazaqstan, Qyrǵyzstan, Ózbekstan jáne Úndistan arqyly ótedi. Sıýantszan 7-ǵasyrda Qytaıdan Úndistanǵa saıahatqa shyqqan. Bul tarıhı jol álemniń saıahatshylary arasynda óte tanymal», - dedi ol.
Odan bólek Nur-Sultan men Almaty qalalaryna atty ekspedıtsııa shyǵady.
«Atty ekspedıtsııa Nur-Sultan qalasynyń Saryarqa aýdanynan shyqsa, ekinshisi Almaty oblysynan shyǵady. Sheteldikterdiń kópshiligi Qazaqstandy kóshpeli mádenıet ókili dep bilmeıdi. Olar kóshpeli dese Mońǵolııa men Qyrǵyzstandy eske alady. Qazaqstan - uly dala eli. Eń birinshi ret adamzat jylqyny Qazaqstanda qolǵa úıretken. Birinshi dóńgelekter de osynda paıda boldy. Osynyń barlyǵyn biz álemge kórsetýimiz kerek», - dedi ol.
