Qazaqstanǵa Túrikmenstannan 256 qandas kóship keldi

NUR-SULTAN. QazAqparat - 2021 jyly 13 mamyr kúni Túrikmenstan Respýblıkasynan 256 qandasymyz «Túrikmendemırellary» memlekettik agenttigi arqyly «Túrikmenbashy – Bolashaq – Jańaózen» baǵyty boıynsha elimizdiń Jańaózen qalasyna jetkizildi.

Bul týraly QazAqparat «Otandastar» uıymyna silteme jasap habarlaıdy.

Qandastar otyrǵan arnaıy poıyzda 8 jolaýshylar, 2 júk vagony jáne 1 dızel lokomotıvi bar.

Poıyz 12 mamyr kúni saǵat 17:20-da «Túrikmenbashy» stantsııasynan jolǵa shyǵyp, «Bolashaq» stantsııasy arqyly «Jańaózen» qalasynyń stantsııasyna 19:00-de kelip jetti.

Qandastyrdy qarsy alý jumystaryn uıymdastyrýǵa QR Syrtqy ister mınıstrligi, Aqparat jáne qoǵamdyq damý mınıstrligi, Densaýlyq saqtaý mınıstrligi, Memlekettik Shekara qyzmeti, Mańǵystaý oblysy ákimdigi, «Qazaqstan temir joly» AQ, «Otandastar qory» KEAQ pen Dúnıejúzi qazaqtary qaýymdastyǵy ókilderi atsalysty.

Elge kelgen qandastardyń vızalyq qujattary tolyq daıyn, juqpaly indetke qatysty PTR test anyqtamalary berilgen.

«Elge el qosylsa - qut» degendeı túrkimen jerinen kelgen kóshtiń ekinshi kerýeni atajurtqa at basyn burdy. Osyǵan deıin aqpan aıynyń sońyna qaraı Túrikmenstannan 153 qandasymyz kóship kelgen edi. Bir qýanarlyǵy el táýelsizdiginiń 30 jyldyǵyna baılanysty syrttaǵy qandastardyń elge kelýi qaıta jandana bastady. Urpaǵynyń keleshegin, atajurtynyń bolashaq damýyn oılaǵan qandastarymyz elge qur qol kelgen joq. Óz mamandyqtary boıynsha jumys istep, qosymsha mamandyq ıgeretin bolady»,-delingen habarlamada.