Qazaqstanǵa transulttyq qylmystyq top múshesi ekstradıtsııalandy
ASTANA. KAZINFORM – Qazaqstanǵa transulttyq uıymdasqan qylmystyq top quramynda jeńgetaılyq jasaǵany kúdikke ilingen Ózbekstan azamaty Grýzııadan ekstradıtsııalandy.
Qazir ol tergeý ızolıatoryna qamaldy, dep habarlaıdy QR Bas prokýratýrasynyń baspasóz qyzmeti.
Bas prokýratýra men Іshki ister mınıstrliginiń Interpol qyzmetkerleri kúdiktini Qazaqstannyń Grýzııadaǵy Elshiliginiń qoldaýymen elge qaıtardy.
Tergeý málimetinshe, kúdikti uıymdasqan qylmystyq toptyń ózge múshelerimen birge jezókshelikpen aınalysatyn jáne seksýaldyq sıpattaǵy qyzmet kórsetetin adamdardyń saýalnamalaryn «Kyzdar.net» ınternet-resýrsynda jarnamalaýǵa kómektesken.
Ol atalǵan adamdardan saıttaǵy saýalnamalarynyń shottaryn tolyqtyrýǵa ótinimder qabyldap, olardyń qyzmetterin ilgeriletýmen aınalysqan.
Top músheleri túsken qarajattan komıssııalyq syıaqy ustap qalyp, qalǵan aqshany saıt ákimshilerine aýdaryp otyrǵan. Osylaısha, jeńgetaılyqqa baǵyttalǵan zańsyz shemanyń úzdiksiz jumys isteýin qamtamasyz etken.
Qylmystyq toptyń birqatar múshesi buǵan deıin ártúrli merzimge bas bostandyǵynan aıyrylǵan. Al kúdikti men toptyń basqa da músheleri qylmystyq qýdalaý organdarynan jasyrynyp, halyqaralyq izdeýge jarııalanǵan.
-Bıyl shildede kúdikti Grýzııa aýmaǵynda ustaldy. Keıin Bas prokýratýranyń suraýy boıynsha Qazaqstanǵa berildi. Oǵan taǵylǵan aıyptar boıynsha múlki tárkilenip, 10 jylǵa deıin bas bostandyǵynan aıyrý jazasy kózdelgen,-delingen habarlamada.
Osyǵan deıin Reseıden Qazaqstanǵa esirtki zerthanalaryn uıymdastyrǵan kúdikti ekstradıtsııalanǵany týraly jazdyq.