Qazaqstanǵa tórtinshi munaı óńdeý zaýyty qanshalyqty qajet
ASTANA. QazAqparat - «KAZENERGY» qaýymdastyǵynyń atqarýshy dırektory Rústem Qabjanov Qazaqstanda tórtinshi munaı óńdeý zaýytynyń qurylysyna qatysty jumystar qaı kezeńde turǵanyn aıtty, dep habarlaıdy QazAqparat.
«Tórtinshi munaı óńdeý zaýyty qurylysy týraly bastama janar-jaǵarmaı tapshylyǵyna qatysty másele týyndaǵan kezde kóterildi. Árıne, máseleni qarastyrǵan kezde, qajetti kólemdi óndiretin óndiris boıynsha suraqtar bolatyny anyq. Qazirgi kezde Energetıka mınıstrliginde qandaı qýat deńgeıi qajet ekeni jáne zaýytty qaıda ornalastyrý máselesi pysyqtalyp jatyr. Sonymen birge, bul zaýytqa tıisti júktemeni qoıý qajettigi bar. Al júktemeni belgileý úshin, aldymen, shıkizatqa baılanysty sharalardy sheshý kerek. ıAǵnı bunyń ózi ońaı emes sharýa», - dedi brıfıngte R. Qabjanov.
Osy oraıda ol Qazaqstanda munaı jetkilikti ekenin, alaıda árbir munaı kólemi jobaǵa engizilgenin ári shartpen bekitilgenin atap ótti. Sáıkesinshe, ken ornyn paıdalanýshylar ózderine júktelgen mindettemelerin oryndaýy tıis.
«Tórtinshi zaýyttyń qurylysy týraly máseleni sheshý kezinde osy aspektilerge mán berý qajet. Ózderińiz bilesizder, Prezıdent tapsyrma berdi, osy oraıda bul mindetter pysyqtalyp jatyr. Atap aıtqanda, bizdiń naryqty eskere otyryp, Qazaqstan aýmaǵyna úlken zaýytty salý - ol eleýli qarjyny qajet etedi. Sonymen qatar qoldanystaǵy zaýyttardy jańǵyrtý jumystaryna da qomaqty qarjy jumsaldy. Qazirgi kezde tehnıkalyq jáne ekonomıkalyq esepteýlerdi aıaqtaý kerek. Budan keıin basshylyq tıisti sheshimin jasaıdy», - dedi Rústem Qabjanov.
