Qazaqstanǵa tórtinshi MÓZ ázirge keregi joq - Qanat Bozymbaev
«Qazaqstanǵa tórtinshi munaı óńdeý zaýyty kerek pe, joq pa degen suraqtyń aınalasyndaǵy pikirtalastyń bárine núkte qoıý úshin biz «QazMunaıGazben» birge byltyr tereń taldaý jumystaryn júrgizgen bolatynbyz. «QazMunaıGaz» tipti naryqty, múmkindikter men trendterdi zertteýge qaýqarly kompanııalardy jaldap, belgili bir shyǵyndy da shyǵarǵany bar. Trendter demekshi, qazirdiń ózinde álemde elektromobılderge degen qyzyǵýshylyqtyń artyp kele jatqanyn da eskerýge tyrystyq. Osyǵan baılanysty, munaı ónimderin tutyný kóleminiń balansyn qaıta zerdeledik. Aqyry, dál qazirgi ýaqytta tórtinshi Munaı óńdeý zaýytyn salýdyń qajeti joq degen qorytyndyǵa keldik», - dedi Qanat Bozymbaev OKQ-da ótken baspasóz máslıhatynda.
Mınıstrdiń aıtýyna qaraǵanda, Qazaqstanda qazirgi tańda úsh birdeı MÓZ bar. Onyń ózi búgingi tańda tolyq qýatynda jumys istemeı tur.
«Oǵan ónimniń keıde artyq shyǵarylyp ketetinin qosa berińiz. Batys Qazaqstandaǵy MÓZ máselen, jalpy qýatynyń 50 paıyzy ǵana jumys atqarýda. Jobalyq sıpaty jaǵynan artyq óndiriletini kózdelgenimen, ishki naryqtaǵy tómen baǵaǵa baılanysty bul zaýyt kondensatty álemdik naryqtyq baǵaǵa saı satyp ala almaıdy», - dedi ol.
Mınıstrdiń paıymynsha, ishki naryqtyń kózqarasymen qaraıtyn bolsaq, Qazaqstanǵa tórtinshi MÓZ-diń qajeti joq.
«Al munaı ónimderin eksporttaý kózqarasymen qarasaq, «munaı ónimin satý tıimdi me, álde shıkizatty satqan yńǵaıly ma?» degen suraqqa jaýap izdeý kerek. Ókinishke qaraı, Qazaqstan alys kontınentaldy memleket. Al munaıdy álemdik naryqta qubyr jelileri arqyly jetkizý yńǵaılyraq. Álemdik naryqtaǵy baǵaǵa qol jetkizý úshin benzınimizdi Qara teńizdiń portyna jetkizýimiz kerek. Ol úshin jol boıy RF men Ýkraına temir joly úshin aqsha tóleý kerek bolady. Álbette, ónimimizdi satýǵa tolyqqandy bolary daýsyz! Sebebi, onyń sapasy eýrostandarttarǵa saı keledi. Alaıda bul jolmen júrse kóliktik shyǵyndarymen birge munaıshy shıkizatty satýdan da az paıda tabady. Sol úshin eksporttyq maqsat úshin MÓZ salyp, ónimdi alysqa eksportqa jiberemiz deý - óz-ózimizdi aldanǵanmen birdeı bolar edi. Kásibı mamandardyń zertteýine súıengen jón. «QazMunaıGaz» kompanııasymen júrgizgen taldaý jumystarynyń nátıjesin biz sizdermen bólisýge daıynbyz», - dedi mınıstr.
