Qazaqstanǵa toǵyz aıda Koreıa Respýblıkasynan 50 myńnan astam týrıst kelgen
ASTANA. KAZINFORM — Týrızm jáne sport mınıstri Erbol Myrzabosynov elordada Nordic Condor Korea kompanııasynyń bas dırektory Sý San Pılmen kezdesti. Taraptar Qazaqstannyń týrıstik áleýetin Ońtústik Koreıada keńinen tanytý, elimizge keletin týrıster sanyn arttyrý jáne Seýlde Kazakh Tourism ókildigin ashý múmkindigin talqylady.
Kezdesý barysynda Nordic Condor Korea kompanııasynyń basshysy Qazaqstanmen týrıstik yntymaqtastyqty damytýǵa qyzyǵýshylyq bildirdi. Buǵan deıin negizinen Eýropa elderine týrıstik saparlar uıymdastyrǵan kompanııa naryqty zerttep, Qazaqstandy koreıalyq saıahatshylar úshin jańa týrıstik baǵyt retinde tanytýdy kózdep otyr. Osy maqsatta kompanııa basshysy Seýlde Kazakh Tourism ókildigin ashýdy usyndy.
Erbol Myrzabosynov Koreıa Respýblıkasynyń Qazaqstan úshin mańyzdy týrıstik naryqtardyń biri ekenin atap ótti. Sondaı-aq elimiz koreıalyq saıahatshylarǵa kórkem tabıǵatyn, tarıhı-mádenı muralaryn, Almaty men Astananyń kórikti jerlerin, sondaı-aq taý týrızminiń múmkindikterin usyna alatynyn jetkizdi.
– Bizdiń maqsatymyz – Qazaqstannyń týrıstik áleýetin keńinen tanytý, koreıalyq týroperatorlarmen baılanysty nyǵaıtý jáne elimizge keletin týrıster sanyn arttyrý. Sondyqtan Nordic Condor Korea kompanııasymen yntymaqtastyq ornatýǵa daıynbyz, – dedi mınıstr.
QR UQK Shekara qyzmetiniń málimetinshe, 2025 jyly Qazaqstanǵa Koreıa Respýblıkasynyń 50,9 myń azamaty kelgen. Al 2026 jyldyń alǵashqy toǵyz aıynda bul kórsetkish 50 292 adamǵa jetken.
Kezdesý qorytyndysynda taraptar yntymaqtastyqtyń naqty baǵyttaryn, ókildiktiń jumys tártibi men qarjylandyrý sharttaryn birlesip pysyqtaýǵa ýaǵdalasty. Joba júzege asqan jaǵdaıda ókildikti ashýǵa jáne onyń kúndelikti qyzmetine bıýdjetten qosymsha qarajat bólý qajet bolmaıdy.
Aıta keteıik, Nordic Condor Korea – halyqaralyq týrızm naryǵynda kópjyldyq tájirıbesi bar koreıalyq kompanııa. Buǵan deıin negizinen Eýropa elderine týrıstik saparlar uıymdastyrǵan kompanııa endi Qazaqstandy koreıalyq saıahatshylar úshin jańa týrıstik baǵyt retinde damytýǵa nıetti.
Ońtústik Koreıaǵa kelgen sheteldik týrıster sany rekordtyq deńgeıge jetkenin jazǵan edik.