Qazaqstanǵa tikeleı sheteldik ınvestıtsııalar aǵyny sońǵy on jylda 219 mlrd. dollardy qurady
ASTANA. QazAqparat - Qazaqstanǵa tikeleı sheteldik ınvestıtsııalar aǵyny sońǵy on jylda 219 mıllıard dollardy qurady. Búgin Senatta ótken Investıtsııalar jáne damý mınıstrliginiń basshylyǵymen kezdesý barysynda palata tóraǵasynyń orynbasary Asqar Beısenbaev osylaı málim etti.
Eske salaıyq, elimizdegi ınvestıtsııalyq ahýaldy jaqsartý máseleleri talqylanǵan sharaǵa senatorlar, Investıtsııalar jáne damý mınıstrliginiń basshylary, Ulttyq ekonomıka mınıstrliginiń ókilderi, «Kaznex Invest» jáne«Atameken» Ulttyq kásipkerler palatasy ókilderi qatysqan bolatyn.
Jıynda sóz sóılegen Senat Tóraǵasynyń orynbasary Asqar Beısenbaev «100 naqty qadam» Ult josparyndaǵy ınvestıtsııalyq ahýaldy jaqsartýǵa baılanysty júktelgen mindetterge toqtaldy.
«Elbasy óńdeýshi ónerkásipke strategııalyq ınvestorlardy tartý, ekonomıkanyń basymdyqqa ıe sektorlarynda birlesken kásiporyndardy qurý, taýarlardyń eksportyn qurý jáne Qazaqstannyń álemdik naryqqa shyǵýy úshin óńdeýshi sektorǵa keminde on shaqty transulttyq kompanııany tartý jónindegi baǵyttardy aıqyndady. Osyǵan baılanysty, Prezıdent ekonomıkaǵa ınvestıtsııalar kólemin jyl saıyn ulǵaıtý, tutastaı alǵanda 10 jyl ishinde keminde 100 mıllıard dollarǵa jetkizý mindetin júktedi. Parlament bul tapsyrmalardy iske asyrý boıynsha ınvestıtsııalyq ahýaldy jaqsartýǵa baǵyttalǵan tıisti zańnamalyq aktiler qabyldap, ınvestıtsııalardy kótermeleý jáne ózara qorǵaý jónindegi birqatar halyqaralyq kelisimder ratıfıkatsııalandy», - dedi Asqar Beısenbaev.
Vıtse-spıkerdiń aıtýynsha, qazirgi tańda ınvestorlar tarapynan Qazaqstanǵa qyzyǵýshylyq arta túsýde. «Máselen, sońǵy on jylda jalpy tikeleı sheteldik ınvestıtsııalar aǵyny 219 mıllıard AQSh dollaryn qurady. Bul jetistikterge qol jetkizýge tereń oılastyrylyp qurylǵan memlekettik saıasat ta yqpal etti»,- dedi A.Beısenbaev.
