Qazaqstanǵa tıesili Batýmı porty men munaı termınaly munaı ótkizý kólemin arttyrmaq
Bul týraly Batumi Industrial Holdings Ltd. Bas dırektory Talǵat Baıtazıev málim etti.
«Ótken jyly Batýmı munaı termınaly arqyly 5 190 myń tonna munaı jóneltildi. Bıylǵy jospar 5 215 myń tonnany quraıdy», -deıdi T. Baıtazıev.
Bas dırektordyń aıtýynsha, búginde termınal munaıdyń jáne munaı ónimderiniń 22 túrin ótkizýge qaýqarly. Bul onyń qara teńiz termınaldaryna qaraǵanda basty artyqshylyǵy bolyp sanalady. «Kýlevı men Batýmı porttarynyń termınaldary arasynda kazaqstandyq munaıdy úlestirý kólemi shamamen 70 jáne 30 paıyzdy quraıdy», - dep naqtylady T. Baıtazıev.
Onyń sózine qaraǵanda qazirgi ýaqytta Batýmı munaı termınaly Qashaǵan ken ornynan munaı tasymaldaý máselesin belsendi túrde talqylaýda.
Eske sala keteıik, Batumi Industrial Holdings Ltd «QazTransOıl» AQ-nyń 100 paıyz enshilis kásiporny. Batumi Industrial Holdings Ltd qurylymynda Batýmı munaı termınaly men Batýmı teńiz porty bar.
