Qazaqstanǵa telefondardy jasyryn tasymaldaýmen kúres máselesi kóterildi
ASTANA. QazAqparat - Qazaqstanda uıaly jáne basqa da symsyz baılanys úshin telefondardy bólshek saýdalaý naryǵy 139 mlrd teńgeni qurap otyr. Bul týraly búgin «Atameken» UKP janyndaǵy Kóleńkeli ekonomıkaǵa qarsy is-qımyl jónindegi keńestiń kezekti otyrysynda QR Parlamenti Májilisiniń depýtaty Amanjan Jamalov málim etti.
«Taýarlardy jasyryn jetkizýge qarsy qadamdarda kedendik baqylaý júıesiniń tıimdiligi tıisti deńgeıde bolmaı tur. Memlekettik statıstıka organdarynyń málimetinshe, uıaly jáne basqa da symsyz baılanys úshin telefondardy bólshek saýdalaý naryǵy 139 mlrd teńgeni qurap otyr. Sarapshylardyń paıymynsha, taýarlardy zańsyz jetkizý kestesi, ıaǵnı «sury» ımport osy naryqta keńinen taralyp úlgergen», - dedi A. Jamalov.
Onyń sózine qaraǵanda, atalǵan jasyryn naryqty taýardy arzan baǵaǵa alýǵa nıetti satyp alýshylardyń ózderi qoldap keledi. Alaıda bul «sury» ımport básekelestikti shektep, syrtqy ekonomıkalyq is-qımyldarǵa zańnama aıasynda qatysyp júrgenderdi teńsizdik jaǵdaıynda qaldyrýda. Halyqaralyq tájirıbede Eýropalyq odaq, AQSh jáne ózge de elderde paıdalanylyp júrgen mobıldi termınaldardy esepke alýdyń avtomattandyrylǵan aqparattyq júıesi telefondardy jasyryn tasymaldaý áreketterine tıimdi tosqaýyl bolyp otyr.
«Qazaqstanda 2015 jyly tanystyrylǵan osyndaı júıe ázirlendi. Sonymen birge, ony paıdalanýdyń sharalary qabyldanbady. Degenmen de onyń beıimdelýin belsendi atqarýǵa jáne kedendik baqylaýdy qamtamasyz etý úshin engizýge zańnamalyq múmkindikter elimizde eskerilgen», - dedi depýtat.
