Qazaqstanǵa tehnıkalyq jáne kásiptik bilimi bar 900 myńǵa jýyq maman qajet
ASTANA. KAZINFORM – Іshki eńbek mıgratsııasyn tıimdi júrgizetin jańa baǵdarlama kerek. Bul týraly «Eńbek adamy – ulttyq ekonomıkanyń ósýi men el órkendeýiniń negizi» taqyrybyna arnalǵan parlamenttik tyńdaýda Senat tóraǵasy Máýlen Áshimbaev málim etti.

- Jalpy, Qazaqstannyń ekonomıkalyq ósýin, áleýmettik turaqtylyǵyn jáne serpindi damýyn qamtamasyz etýde eńbek adamynyń alatyn orny erekshe. Sondyqtan Prezıdent Qasym-Jomart Toqaev osy máselege basa mán berip, 2025 jyldy «Jumysshy mamandyqtar jyly» dep jarııalady. Memleket basshysy ekonomıkany ártaraptandyrý arqyly jalpy ishki ónimdi eki esege arttyrý sııaqty aldaǵy ýaqytta iske asyrylýy tıis naqty mindetterdi belgiledi. Osy maqsatqa jetý úshin bilikti mamandardy daıarlaýdyń mańyzy asa zor. Shyn máninde, eńbeksiz turaqty ekonomıkalyq ósý bolmaıtyny belgili. Sol sebepti bul baǵytty jańa deńgeıge kóterý basty mindettirdiń birine aınalyp otyr, - dedi M.Áshimbaev.
Onyń aıtýynsha, qazirgi tańda elimizde bilikti mamandardyń tapshylyǵy anyq baıqalyp otyr. Ásirese, ınjenerler, tehnıkalyq qyzmetkerler, agronomdar, veterınarlar jáne basqa da mańyzdy mamandyq ıelerine suranys joǵary.
- Aldaǵy ýaqytta bul úrdis odan ári arta bermek. Eńbek resýrstaryn damytý ortalyǵynyń boljamy boıynsha 2030 jylǵa deıin el ekonomıkasyna barlyq baǵytta qosymsha 1,6 mln adam qajet bolady. qazirdiń ózinde Qazaqstanǵa tehnıkalyq jáne kásiptik bilimi bar 900 myńǵa jýyq maman asa qajet. Al joǵary bilimi bar mamandarǵa qajettilik 430 myń adamdy quraıdy. Qurylys, aýyl sharýashylyǵy, óńdeý ónerkásibi, kólik sııaqty negizgi salalarda eńbek resýrstaryna degen joǵary suranys qalyptasyp otyr, - dedi Senat tóraǵasy.
Onyń sózine qaraǵanda, bul jaǵdaı óńirlik ári demografııalyq damýda teńgerimdiliktiń bolmaýynan jáne aýyldan qalaǵa kóshetinderdiń kóptiginen kúrdelene túsip otyr. Búginde jastarymyz negizinen jumys kúshi artyq ońtústiktegi 4 óńirde - Túrkistan, Almaty, Jambyl, Qyzylorda oblystarynda turady. Sondaı-aq Almaty men Shymkentte de jastar kóp.
Elimizdegi jastardyń jartysynan astamy osy óńirlerge tıesili. Kadr tapshylyǵyn sheshý úshin kásiptik bilim berý júıesin jańǵyrtýdy, dýaldy oqytýdy damytýdy, jumysshy mamandyqtaryn dáripteýdi jáne eńbek mıgratsııasyn qoldaýdy qamtıtyn keshendi tásil qajet.
- Jalpy, ishki eńbek mıgratsııasyn tıimdi júrgizetin jańa baǵdarlama kerek dep oılaımyz, - dedi Máýlen Áshimbaev.
Eske salsaq, EXPO kórme alańynda bolashaq mamandardyń, jumys berýshiler men kásiptik-tehnıkalyq uıymdardyń basyn qosqan «Jumysshy mamandyqtarynyń qalasy» festıvali ótti.