Qazaqstanǵa Taıaý Shyǵys elderinen bosqyndardy qabyldaý týraly ótinish túsken joq – SІM
ASTANA. KAZINFORM — QR Syrtqy ister mınıstrliginiń resmı ókili Erlan Jetibaev Taıaý Shyǵys elderinen bosqyndardy qabyldaý yqtımaldyǵyna qatysty Qazaqstannyń ustanymyn túsindirdi.
Onyń aıtýynsha, áleýmettik jelilerde taraǵan «Qazaqstan Taıaý Shyǵys óńirindegi elderden bosqyndardy qabyldaýǵa daıyn» degen aqparat jalǵan.
— Eń aldymen, óńir memleketteri nemese halyqaralyq uıymdar tarapynan Qazaqstanǵa bosqyndardy qabyldaý máselesi boıynsha eshqandaı resmı ótinish túspegenin aıtý kerek. Áńgime Qazaqstanda bosqyndardy qabyldaýǵa qatysty hattamanyń bolýy jóninde edi, olardy ornalastyrý jospary týraly málimdemeler jasalǵan joq. Sondaı-aq bul másele boıynsha qandaı da bir sheshimder qabyldanǵan joq, - dedi ol.
Resmı ókil Qazaqstannyń bosqyndar týraly halyqaralyq konventsııanyń qatysýshysy ekenin, sondyqtan elde tıisti rásimder men is-qımyl algorıtmderi qarastyrylǵanyn atap ótti.
— Aıtylǵan sózderdi basqa qyrynan tápsirleý durys emes. BAQ ókilderin, ásirese sezimtal máseleler boıynsha aqparat taratqanda, jaýapkershilik tanytýǵa shaqyramyz. Burmalanǵan nemese konteksten julyp alynǵan aqparat qoǵamda negizsiz rezonans týdyryp, memlekettiń ustanymy týraly jańsaq túsinik qalyptastyrýy múmkin, - deıdi E.Jetibaev.
Sonymen birge, mınıstrlik ókili mundaı máseleler boıynsha kez kelgen sheshim yqtımal bosqyndar qaı eldiń azamaty bolsa, sol eldiń ustanymyn eskere otyryp qabyldanatynyn aıtty.
Eske sala keteıik, búgingi kúnge deıin shıelenis aımaqtarynan 946 azamat aman-esen shyǵaryldy. Oman astanasy Maskat qalasynan Almatyǵa 314 qazaqstandyq mingen reıs ushyp keldi.
