Qazaqstanǵa tartylǵan ınvestıtsııanyń tórtten biri Atyraý oblysyna tıesili

NUR-SULTAN. QazAqparat – Qazaqstanda óndiriletin ónimniń 23%-y Atyraý oblysyna tıesili, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngte Atyraý oblysynyń ákimi Mahambet Dosmuhambetov osyndaı derek keltirdi.

«Atyraý oblysynyń ónerkásip óniminiń kólemi jyl basynan beri 6,7 trln teńge boldy. Óńirdiń úlesine respýblıka ónerkásibiniń barlyq kóleminiń 23%-y tıesili. Onyń ishinde óńdeý ónerkásibi óniminiń kólemi 545 mlrd teńgeden asty. Sondaı-aq, qurylys 110,8%, aýyl sharýashylyǵy 100,6%, saýda 146,1%, kólik 117,6%, baılanys 101,4% salalarynda ósim baıqalady», - dep habarlady Atyraý oblysynyń ákimi.

Ákimniń málimeti boıynsha, Atyraý óńiri negizgi kapıtalǵa salynǵan ınvestıtsııalar boıynsha da kósh bastap tur.

«Jyl basynan negizgi kapıtalǵa 2 trln 336 mlrd teńge ınvestıtsııa tartyldy. Bul respýblıka boıynsha barlyq ınvestıtsııalardyń tórtten bir bóligin quraıdy», - dedi Mahambet Dosmuhambetov.