Qazaqstanǵa tartylǵan ınvestıtsııanyń negizgi úlesi EO-ǵa tıesili
ASTANA. QazAqparat - Eýropalyq odaq elderi toǵyz jylda Qazaqstanǵa 95 mlrd. dollar ınvestıtsııa saldy. Bul týraly búgin Ortalyq kommýnıkatsııalar qyzmetindegi brıfıngte «KAZNEX INVEST» eksport jáne ınvestıtsııalar boıynsha ulttyq agentigi» AQ basqarma tóraǵasynyń orynbasary Ásel Erǵazıeva málim etti.
Onyń sózine qaraǵanda, búginde Qazaqstanda qaıta óńdeý salasynda 21 mlrd. dollar kóleminde 130 -ǵa jýyq ınvestıtsııalyq joba iske qosyldy. Qazirgi kezde olarda 36 mlrd. dollar somasynda 70-ke tarta joba bar kórinedi. «Bul jobalardyń basym bóligi júzege asady dep oılaımyz jáne elimiz úshin suranysqa ıe bolady», -dedi ol.
Qazaqstanǵa EO elderi tarapynan ınvestıtsııa kólemi qomaqty ekenin toqtalǵan Á. Erǵazıeva, «2005 jyldan bastap, 2014 jyldyń birinshi jartyjyldyǵy aralyǵynda EO elderi 95 mlrd. dollar kóleminde ınvestıtsııa saldy. AQSh 19 mlrd. dollardy, al Qytaı 11,8 mlrd. dollar ınvestıtsııa bóldi»,-dedi.
Aıta keteıik, búginde elimizde elýden astam álemdik iri kompanııalar qyzmet etýde.
