Qazaqstanǵa tanymal shveıtsarlyq tennısshi Martına Hıngıs keledi
ASTANA. 27 qyrkúıek. QazAqparat - Qazaqstan Tennıs federatsııasy elimizde balalar tennısin tanymal etý ári damytý maqsatynda 1-2 qazan kúnderi shveıtsarlyq tennısshi Martına Hıngıstiń saparyn uıymdastyrady.
Federatsııa baspasóz qyzmetiniń aqparatyna qaraǵanda, álemdik sanattaǵy tennısshi Astana men Almaty qalalarynda bolyp, sheberlik sabaqtaryn ótkizedi. Sondaı-aq arnaıy uıymdastyrylǵan baspasóz máslıhatyna qatysyp, jankúıerlerine qoltańba beretin bolady.
1980 jyly dúnıege kelgen Martına Hıngıs 1997, 1999 jáne 2000 jyldary álemniń birinshi raketkasy bolǵan. Jeke razrıadta Úlken dýlyǵa týrnırleriniń 5 dúrkin jeńimpazy. Ol jaraqatyna baılanysty 2007 jyly sporttyq mansabyn támamdaǵan bolatyn.
