Qazaqstanǵa taǵy kelgim keledi - Shahmattan álem chempıony Dın Lıjen
«Eń aldymen, Prezıdent myrzaǵa qabyldaýy úshin zor rızashylyǵymdy bildiremin. Shyn máninde, birinshilik barysynda óte tartysty oıyn ótti. Osy rette qarsylasyma tamasha oıyny, myqty básekeles bolǵany úshin alǵys aıtamyn. Sonymen qatar Qazaqstanǵa taǵy da oralǵym keletinin atap ótkenim jón», - dedi búgin Aqordada Memleket basshysy Qasym-Jomart Toqaevtyń qabyldaýynan keıin pikir bildirgen qytaı grossmeıstri.
Al reseılik grossmeıster ıAn Nepomnıaşıı Qazaqstanda shahmat jankúıerleriniń kóptigin baıqaǵandyǵyn aıtady.
«Astanada óz úıimdegideı sezindim. Sondyqtan qonajaılyq úshin úlken rızashylyǵymdy bildiremin. Matchqa da, qoltańba berý rásimine de balalardyń kóp kelýi qýantady. Memleket basshysynyń da qyzyǵýshylyq tanytqany tamasha jaıt boldy. Qazaqstannyń qonaqjaı jerinde áli de talaı mańyzdy ári qyzyqty jarystar ótetinine senimdimin jáne shahmatty damytýda zor tabys tileımin», - dedi ıAn Nepomnıaşıı.
Eske salaıyq, búgin Prezıdent Qasym-Jomart Toqaev klassıkalyq shahmat boıynsha álem chempıony ataǵy úshin saıysqa túsken ıAn Nepomnıaşıı men Dın Lıjendi, sondaı-aq Halyqaralyq shahmat federatsııasynyń (FIDE) prezıdenti Arkadıı Dvorkovıchti qabyldady.
Arkadıı Dvorkovıch qurmet kórsetkeni úshin Prezıdentke alǵys aıtty.
