Qazaqstanǵa taǵy 250 myń tonna qant ákelýge múmkindik bar – Erbol Qarashókeev
Bul týraly QR Aýyl sharýashylyǵy mınıstri Erbol Qarashókeev Úkimet otyrysynda málim etti.
Jıyn barysynda Úkimet basshysy Álıhan Smaıylov elde qantqa suranystyń artyp ketýine baılanysty qandaı sharalar qabyldanyp jatqanyn surady.
«Aýyl sharýashylyǵy mınıstrligi Saýda jáne ıntegratsııa mınıstrligimen birge apta saıyn ishki naryqtyń azyq-túlik taýarlarymen qamtamasyz etilýin taldaýdy júrgizip otyrmyz. Ahýaldy turaqty baqylaýda ustap otyrmyz. Búgingi tańda shamamen 1,3 mln tonna áleýmettik mańyzy bar azyq-túlik qory jınaldy. Ol qor kún saıyn tolyqtyrylyp otyr. Atap aıtsaq, 144 myń tonna un, 40 myń tonnadaı kúrish jınalǵan. 21,5 myń tonna makaron ónimderi jáne shamamen 900 myń tonnadaı kókónis ónimderi qoımada jınalyp tur. Azyq-túlik qorlary kún saıyn jańartylýda, ony daıarlaýǵa qajet shıkizat ta jetkilikti. Sol sebepti ahýal turaqty. Ózimizge, elge jetetindeı áleýmettik mańyzy bar azyq-túliktiń kólemi jetkilikti», - degen mınıstr qoımalardaǵy qant kólemi týraly naqty aqparat berdi.
«Qazirgi tańda bizde 90 myń tonnadaı qant bar. Onyń ishinde turaqtandyrý qorlarynda, saýda obektilerinde, qoımalarda 38,2 myń tonna qant bar. Zaýyttardaǵy shıki qantty esepke alatyn bolsaq, 20 myń tonna daıyn qant, 20 myń tonnadaı shıki qant bar. Azyq-túlik kelisimshart korporatsııasynda 2,5 myń tonna qant bar. Osy qantty óńirlerge bólý jumystary júrip jatyr. Odan basqa Qazaqstan Respýblıkasynyń 31 tamyzǵa deıin 250 myń tonna kóleminde aq qant pen shıki qantty bajsyz ákelýge quqyǵy bar. Ol kvotalar qazir bólinip jatyr. Syrtqy naryqtaǵy saýda qyzmetine qatysýshylar osy qantty ákelý jumystaryn bastap ketti. Jaqyn arada ákele bastaıdy», - dedi Erbol Qarashókeev.
