Qazaqstanǵa syrttan benzın ımporttaýdyń qajeti joq - Qanat Bozymbaev

ASTANA. QazAqparat - Benzın ımportynyń qajettigi baıqalmaıdy. Bul týraly búgin Astanada Energetıka mınıstri Qanat Bozymbaev málim etti, dep habarlaıdy QazAqparat.

«Búgin tańerteń elimizdegi AI-92 benzıniniń qory 340 myń tonnany qurady. Bir aptanyń ishinde onyń kólemi 15 myń tonnadan astam mólsherge artty. Buǵan eki zaýyttyń jańǵyrtylýy yqpal etti, ıaǵnı olardyń qýattylyǵy da joǵarylady. Osy oraıda eýro-4, eýro-5 deńgeıine aýystyq. Munaı kólemin biz boljaǵan bolatynbyz, sondyqtan Reseı nemese basqa da baǵyttardan benzın ımportynyń eleýli kólemde bolmaıtynyn baıqap otyrmyz», - dedi mınıstr baspasóz máslıhatynda.

Onyń sózine qaraǵanda, Ortalyq Azııaǵa eksportty ashý kózdelýde. Osy oraıda reseılik áriptestermen bul eksportty ashý boıynsha máseleler pysyqtalýda. Jazdyń aıaǵyna qaraı tıisti kelisimderge qol qoıý josparlanyp otyr.