Qazaqstanǵa syrttan jumyrtqa ákelýge alty aıǵa tyıym salyndy
ASTANA. KAZINFORM – Jumyrtqa ımportyna ýaqytsha tyıym kóktemgi-jazǵy kezeńde otandyq taýar óndirýshilerdi qoldaý maqsatynda engizilip otyr. Bul týraly Aýyl sharýashylyǵy mınıstrligi habarlaıdy.
«Qazaqstan Respýblıkasynyń aýmaǵyna taýyq jumyrtqalaryn ákelýge tyıym salýdy engizý týraly» Aýyl sharýashylyǵy mınıstriniń 2025 jylǵy 4 sáýirdegi № 101 buıryǵymen Qazaqstan Respýblıkasynyń aýmaǵyna Qazaqstan Respýblıkasynyń aýmaǵyna barlyq kólik túrlerimen úshinshi elderden jáne Eýrazııalyq ekonomıkalyq odaq elderinen taýyq jumyrtqalaryn (SEQ TN: 040721) ákelýge alty aı merzimge tyıym salyndy.
Aıta ketý kerek, tyıym Qazaqstan Respýblıkasynyń aýmaǵy arqyly taýyq jumyrtqalarynyń tranzıtin, sondaı-aq olardyń Eýrazııalyq ekonomıkalyq odaqqa múshe bir memlekettiń aýmaǵynan Eýrazııalyq ekonomıkalyq odaqqa múshe ekinshi memlekettiń aýmaǵyna Qazaqstan Respýblıkasynyń aýmaǵy arqyly ótýine qatysty qoldanylmaıdy.
- Atalǵan kezeńde jumyrtqaǵa suranystyń tómendeýi baıqalady, naryqtyń qajettiligi ónerkásiptik óndiris arqasynda jáne úı sharýashylyǵy ónimderiniń naryqta belsendi bolýymen tolyǵymen jabylady. Bul faktor qus fabrıkalarynyń qyzmetine teris áser etedi, jumyrtqa baǵasy tómendeıdi. Baǵanyń ózindik qunnan tómen túsýi kásiporyndardyń rentabeldiligine teris áser etedi, - delingen habarlamada.
Sondaı-aq vedomstvo syrttan jumyrtqa ákelýge tyıymnyń taǵy bir sebebin osy kezeńde jumyrtqany saqtaý merzimi qysqaratynymen baılanystyryp otyr.
- Tehnologııalyq erekshelikterge baılanysty jumyrtqa óndirý kólemi azaımaıdy, bul qoımalarda taýardyń artyq jınalýyna ákeledi. Osyǵan baılanysty, otandyq taýar óndirýshilerdi qoldaý jáne ishki naryqty qorǵaý maqsatynda syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııada kóktemgi-jazǵy kezeńge barlyq kólik túrlerimen taýyq jumyrtqalaryn Qazaqstan Respýblıkasynyń aýmaǵyna ákelýge ýaqytsha shekteý sharalaryn belgileý maquldandy, - deıdi mınıstrlikten.
Buıryq búgin kúshine endi.
Eske sala ketsek, bıyl aqpanda Saýda jáne ıntegratsııa mınıstrligi, Aýyl sharýashylyǵy mınıstrligi, Qus ósirýshiler odaǵy, jumyrtqa óndirýshiler salalyq qaýymdastyǵy jáne Saýda jelileri odaǵy áleýmettik mańyzdy azyq-túlik taýarlarynyń baǵasyn turaqtandyrý sharalaryn iske asyrý boıynsha yntymaqtastyq memorandýmyna qol qoıdy.