Qazaqstanǵa sıntetıkalyq esirtki jetkizip kelgen transulttyq arnanyń joly kesildi

NUR-SULTAN. QazAqparat - Іshki ister mınıstrligi sıntetıkalyq esirtki jetkizetin transulttyq arnany joıdy, dep habarlaıdy Polisia.kz.

Qazaqstan Respýblıkasy Іshki ister mınıstrliginiń qyzmetkerlerimen esirtkini jetkizý arnalarynyń jolyn kesý maqsatynda shekaralas memleketterdiń esirtkige qarsy vedomstvolarymen tyǵyz yntymaqtastyq ornatylǵan.

Almaty, Aqtóbe, Atyraý jáne Shyǵys Qazaqstan oblystarynda jarty jyl boıy esirtki satýshylardyń áreketin joıý boıynsha birlesken arnaıy operatsııa júrgizildi.

Shetelden sıntetıkalyq esirtki eritindisi bar sálemdemelerdi alyp otyrǵan Qazaqstannyń bes azamaty anyqtaldy.

Olar óndiris protsesinde suıyqtyqty bý arqyly keptirip, qurǵaq ónim alyp otyrǵan, osylaı sıntetıkalyq esirtkilerdi asa iri mólsherde satý úshin bólip daıyndaǵan.

Departament bastyǵynyń mindetin atqarýshy Asqar Muhametqalıevtiń túsindirýinshe, sońǵy jyldary sıntetıkalyq esirtkiler men olardy óndirýge arnalǵan quramdas bólikteriniń shekaralas memleketterden jetkiziletindigin eskere otyryp, sheteldik áriptestermen yntymaqtastyq basym baǵyt retinde aıqyndaldy.

Osylaısha bıylǵy úsh aıda ǵana qazaqstandyq polıtseıler osyndaı ózara is-qımyl sheńberinde sheteldiń esirtkige qarsy qurylymdarynan aqparat alǵannan keıin qylmys jasaý barysynda 9 adamdy ustaǵan.

Zańsyz aınalymnan segiz keliden astam sıntetıkalyq esirtki tárkilendi.

Osy jyldyń birinshi toqsanynda ishki ister organdary barlyǵy 695 esirtki qylmysyn, onyń ishinde asa iri kólemde esirtki zattaryn saqtaýdyń 133 faktisi, kontrabandanyń 30 faktisi, prıton ustaýdyń bes faktisi anyqtaldy.

Zańsyz aınalymnan tonnaǵa jýyq esirtki tárkilendi. Onyń ishinde 900 gramǵa jýyq geroın, 42 keliden astam sıntetıkalyq esirtki bar.

Nur-Sultan qalasy jáne Atyraý oblysy aýmaǵynda esirtki satýmen aınalysqan eki uıymdasqan qylmystyq top áreketiniń joly kesildi.

Nur-Sultan, Almaty qalalarynda, Almaty, Aqtóbe, Shyǵys Qazaqstan oblystarynda segiz esirtki zerthanasy joıyldy.

Esirtkilerdi jarnamalaý jáne nasıhattaý faktileri boıynsha 33 jáne ınternet arqyly ótkizý faktileri boıynsha 10 sotqa deıingi óndiris tirkeldi.

Esirtki taratý týraly aqparatty qamtıtyn 565 veb-saıt, akkaýnt jáne basqa resýrstar anyqtalyp, buǵattaldy.