Qazaqstanǵa Shyǵys-Tıbet medıtsınasyn alǵash tanystyrǵan ǵalym J. Zekeıuly týraly jazylǵan kitap jaryq kórdi

Atalmysh kitapty qurastyrýshylar - Qaırat Qul-Muhammed, Bilál Qýanysh, Mamyrbek Tókesh. Kitap "Qazyǵurt" baspasynan 4 000 danamen jaryq kórdi. Tórt bólimnen turatyn kitapta dańqty dáriger, bilikti ǵalymnyń ómirbaıany, em men emshiniń erekshe qasıetteri, óner, bilim, ǵylym, mádenıet, densaýlyq salalarynda BAQ ókilderine bergen suhbattary, onyń el, jer, til, ult máselelerin kótergen maqalalary, el aǵalarynyń shıpager týraly aıtqan pikirleri, "Jas-Aı" medıtsınalyq ortalyǵyna kelip, aýrýynan qulan taza aıyǵyp shyqqan naýqastardyń rııasyz alǵystary, sonymen qatar, Shyǵys-Tıbet eminiń qupııa syrlary týraly jazylǵan. Kitap kópshilik qaýymǵa arnalǵan.

"Bul kitapty jarty jyl ishinde jazdyq. Kitap medıtsınalyq eńbektiń jınaǵy bolǵandyqtan qarapaıym tilmen, túsinikti etip jazyldy, tek derektermen, dáıekterden turatyn maǵlumattardy suryptap berýge tyrystyq",- dedi kitapty qurastyrýshylardyń biri Qaırat Qul-Muhammed.

Onyń aıtýynsha alty jyl ishinde "Jas-Aı" medıtsınalyq ortalyǵy 50 000-nan asa emdelýshilerdi qabyldap, onyń 5-6 myńnan asa jaǵdaıy joq otbasylarǵa, qaltasy kótere almaıtyn adamdarǵa tegin kómek kórsetken. "Jasan Zekeıuly sonymen qatar, basqa salalarǵa nazar aýdaryp júretin azamat. Eńbegin kórsete almaı júrgen qalamgerlerge, aqyn-jazýshylarǵa, ánshi-kúıshilerge jarq etip kórinýine kómegin kórsetip kele jatyr",- dep atap ótti Qaırat Qul-Muhammed.

Senat depýtaty, QR UǴA-nyń akademıgi Ǵarıfolla Esimniń aıtýynsha kitaptyń qundylyǵy - Jasan Zekeıulynyń emshilik qyzmetinde. "Ol Shyǵys-Tıbet medıtsınasynyń sheber mamany. Onyń jasap jatqan eńbegi eleýli. Úkimettiń kómeginsiz ortalyq ashyp, halyqqa úlken kómegin tıgizip keledi. Osyndaı ıgi is jasap júrgen azamattardy nasıhattap, kitap jazý óte oryndy. Elimizde ınemen emdeý ortalyqtarynyń kóp bolýyna kómektesý kerek. Ár oblysta bolǵany jón dep sanaımyn. Óıtkeni, ınemen emdeý - ol adamnyń boıyndaǵy óz qýatyna múmkindik berý degen sóz. Al dárimen emdeý - ol bir jerińdi jazsa, ekinshi jerińe zııan ákeledi", - dedi ol.

Ol sonymen qatar, "eńbektiń medıtsına salasynda qyzmet jasaıtyn jas mamandardyń tıbettik emdeý tásilderin ıgerýine tıgizetin yqpaly kóp", - dedi. "Óıtkeni kitapta dárigerdiń naýqastardy emdeýdegi ózindik erekshe tásilderi men ıne terapııasy, hırýrgııa mamandyǵy boıynsha Pekın, Tıanjın qalalarynda bilimin jetildirý jolyndaǵy izdenisteri jaıly sóz bolady. Elin súıgen, eli súıgen azamattyń ónegege toly ómiri jaıly kitaptyń keleshek urpaqqa berer tárbıelik mańyzy zor", - dep atap ótti Ǵ. Esim. Onyń aıtýynsha halyq arasynda "Altyn qoldy dáriger" atanǵan Jasan Zekeıuly "Jas-Aı" medıtsınalyq ortalyǵyn basqaratyn bilikti basshy ǵana emes, bilgenin jurtynan aıamaıtyn jomart jan.

Qaırat Qul-Muhammedtiń aıtýynsha, Tıbet eli týraly kitap munymen shektelmeıdi. "Aldaǵy ýaqytta Jasan Zekeıulynyń qytaı tilinde jaryq kórgen birneshe ǵylymı eńbekteri qazaq tiline aýdarylyp, qalyń oqyrman qaýymǵa jol tartady", dep habarlady ol.

Jasan Zekeıuly - QR densaýlyq saqtaý isiniń úzdigi, Vena halyqaralyq ýnıversıtetiniń qurmetti professory, Halyqaralyq Ǵylym Akademııasy men Halyqaralyq Reseı Shyǵarmashylyq akademııasynyń akademıgi, "Ómirdi qorǵaý" qaıyrymdylyq qorynyń quryltaıshysy, "Jas-Aı" jýrnalynyń bas redaktory, medıtsına ǵylymynyń eki patentiniń ıegeri, 50-den astam ǵylymı eńbektiń avtory.