Qazaqstanǵa sheteldik kombaındar arnaıy jeńildikpen ákelinýi múmkin

ASTANA. 22 qańtar. QazAqparat - Aýyl sharýashylyǵy mınıstrligi Eýrazııalyq ekonomıkalyq keńistiktiń arnaıy komıssııasyna hat jazyp, Qazaqstanǵa shetelden jetiziletin astyq kombaındaryna jeńildik berýdi surady.

Bul týraly búgin QR Aýyl sharýashylyǵy vıtse-mınıstri Múslim Ómirııaev málim etti.

Onyń aıtýynsha, EEK 2013 jyly aqpannyń 25-sinen bastap Kedendik odaq aıasynda astyq kombaındarynyń ımportyna aldyn ala baj salyǵyn engizip, ony shildeniń 5-sine deıin ustaýǵa sheshim qabyldaǵan. Endi, qazirgi 5 paıyzdyq salyqpen qosa, 27,5 paıyz kólemindegi ımporttyq bajdy tóleýge týra keledi. «Demek, Kedendik odaqqa jetkiziletin sheteldik kombaındardyń baj salyǵy 32,5 paıyzdy quraıtyn bolady. Bul jaǵdaı Qazaqstandaǵy aýyl sharýashylyǵy ónim óndirýshilerine keri áser tıgizbes úshin mınıstrlik Eýrazııalyq ekonomıkalyq keńistiktiń arnaıy komıssııasyna hat jazyp, Qazaqstanǵa shetelden jetkiziletin astyq kombaındaryna arnaıy kvota berýdi surady. Kvotada 200 kombaın kórsetilgen. Bul - bizdiń bir jylda satyp alatyn sheteldik kombaındardyń ortasha kólemi», - deıdi M.Ómirııaev.