Qazaqstanǵa shetelden qandaı kólikterdi kirgizýge bolady

ASTANA. QazAqparat - Bas kólik prokýratýrasy elge ákelingen apattar kezindegi shuǵyl shaqyrý júıesi joq kólikterge qaýipsizdik týraly kýálikter berýden bas tartýdyń zańdylyǵyna taldaý júrgizdi, dep habarlaıdy QazAqparat.

«Taldaý synaq zerthanalarynyń nátıjesi Tehnıkalyq retteý jáne metrologııa komıtetiniń Ulttyq akkredıtteý ortalyǵy hatyna silteme jasaı otyryp, mundaı kólik quraldaryna qaýipsizdik týraly kýálikter berýden bas tartqanyn kórsetti. Bul áreketter 244 jeke jáne zańdy tulǵanyń kólik quraldaryn kedendik resimdeýine kedergi keltirgen», - delingen Bas kólik prokýratýrasy baspasóz qyzmetiniń málimetinde.

Sonymen qatar, Ortalyqtyń nusqaýy boıynsha 2016 jylǵy 1 qańtardan bastap berilgen kýálikterdiń kúshin joıý josparlanǵan. Bul taǵy 17 209 avtokólik ıeleriniń quqyqtaryn jappaı shekteýge ákep soǵýy múmkin edi.

«Ortalyq qaýipsizdik týraly kýálikter berýdi toqtata turý týraly sheshim qabyldaı otyryp, óz ókilettikteri sheńberinen shyqqany anyqtaldy. Sebebi «Sáıkestikti baǵalaý salasyndaǵy akkredıtteý týraly» Zańda mundaı ókilettikter aıqyndalmaǵan, osylaısha azamattardyń óz múlkin erkin paıdalanýda konstıtýtsııalyq quqyqtaryn shektegen», - dep atap ótilgen prokýratýra habarlamasynda.

Rasynda, «Dóńgelekti kólik quraldarynyń qaýipsizdigi týraly» Keden odaǵynyń Tehnıkalyq reglamenti 2016 jylǵy 1 qańtardan bastap, EAEO-ǵa múshe memleketterdiń aýmaǵyna aınalymǵa apat kezinde shuǵyl jedel qyzmetterdi shaqyrý qurylǵylarymen jabdyqtalǵan kólik quraldaryn shyǵarýdy buıyrady.

Degenmen de el aýmaǵyna mundaı qurylǵysyz avtomobılderdi ákelýge tyıym salynbaıdy, sebebi olar sertıfıkattalǵan dılerlik ortalyqtarda ornatylýy múmkin.

«Bas kólik prokýratýrasynyń jazbasha nusqaýy boıynsha Ulttyq akkredıtteý ortalyǵy zańsyz hatty keri qaıtaryp aldy. Synaq zerthanalary kýálikter berýin qaıta bastady», - dep naqtylady baspasóz qyzmeti.