Qazaqstanǵa shetel bankteri kelse, arzan kredıt alýǵa múmkindik bola ma

ASTANA. QazAqparat – Qarjy naryǵyn retteý jáne damytý agenttiginiń tóraǵasy Mádına Ábilqasymova sheteldik bankterdiń elge kelýi nesıe naryǵyna qalaı áser etetinin aıtty, dep habarlaıdy QazAqparat tilshisi.

Agenttik basshysy Parlament palatalarynyń birlesken otyrysynan keıin BAQ ókilderine Qazaqstannyń qarjy naryǵyna sheteldik birneshe bank kirýi múmkin ekenin aıtty.

«Áńgime Reseı sııaqty kórshiles elderdiń bankteri týraly bolyp otyrǵan joq. Qazir birneshe ınvestor qyzyǵýshylyq tanytyp otyr. Olar Eýropa men arab elderinen», - dedi ol.

Sondaı-aq, Mádına Ábilqasymova eýropalyq bankter Qazaqstanǵa kirse, nesıe qanshalyqty arzandaýy múmkin ekenin aıtty.

«Depozıtterdiń de, nesıelerdiń de paıyzdyq stavkasy bazalyq mólsherlemege qaraı qalyptasady. Depozıtten de, nesıeden de qosymsha tabys tabý úshin bankterge bazalyq mólsherlemeniń deńgeıin ustaý kerek bolady. Sonymen birge bankter aktıviniń 30 paıyzynan kem emes mólsherde joǵary lıkvıdti aktıv ustaýǵa tıis. Bul salymshylar aıaq astynan aktıvterdi jappaı sheship alǵan jaǵdaıǵa kerek. Sondyqtan, baza – negizgi faktor. Tipti jańa bank kelgen kúnniń ózinde ol da bazalyq mólsherlemege qarap baǵdar ustaıtyn bolady. ıAǵnı, ekonomıkadaǵy aqshanyń qunyna qaraıdy. Sheteldik bankter kelip, bizdegiden basqa mólsherlememen nesıe beredi dep kútý... Ol bulaı jumys istemeıdi. Ekonomıkadaǵy aqshanyń quny degen bar. Olar bazalyq mólsherleme qunyna qaraıdy», - dedi agenttik tóraǵasy.