Qazaqstanǵa shet elden kelgenderdiń barlyǵy oqshaýlandyrylady
NUR-SULTAN. QazAqparat - Qazaqstanǵa shet elden kelgenderdiń barlyǵy oqshaýlandyrylady. Bul týraly «Habar 24» telearnasynyń tikeleı efırinen QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.
«Shetelden kelgen barlyq tulǵalardy oqshaýlaý jáne saraptama alý engizilgendigin taǵy da qaıtalaǵym keledi. QR bas sanıtarlyq dárigeriniń qaýlysymen kóshelerdi, jaıaý júrginshiler jolyn, aıaldamalardy, saýda oıyn-saýyq ortalyqtaryn, dinı maqsattaǵy, kommýnaldyq sharýashylyq nysandaryn, saparjaılardy, áýejaılardy, bazarlardy, azyq-túlik ónerkásibi, qoǵamdyq tamaqtaný nysandaryn zararsyzdandyrý engizildi», - dedi mınıstr.
Onyń dereginshe, elimizdiń Densaýlyq saqtaý mınıstrligi ınfektsııalyq statsıonarlarda 2 230 tósek ornyn, 6 900 tósek-orynǵa arnalǵan 70 provızorlyq statsıonardy jáne 14 myń tósek-orynǵa arnalǵan 89 karantındik statsıonardy bólip otyr.
«EAEO-men ishki shekaralarǵa sanıtarlyq-epıdemıologııalyq qyzmettiń 152 mamany is-saparǵa jiberildi», - dedi Dáýren Abaev.
