Qazaqstanǵa saparym boıynsha eshqandaı saıası sheshim qabyldanbaıdy – EO sanktsııalar jónindegi arnaıy ókili
«Bir nárseni anyqtap keteıik. Eýropalyq Odaqtyń sanktsııalary úshinshi memleketterge qarsy baǵyttalmaǵan. Biz osy úshinshi memleketterdiń Reseımen, tarıhı, zańı qarym-qatynastaryn moıyndaımyz jáne ol qarym-qatynastaryna esh nuqsan keltirýge tyryspaımyz.
Biz úshinshi memleketterge (Eýropalyq Odaqtan) saýda kóleminiń ulǵaıýyn kórip otyrmyz. Bul saýda kólemi qandaı taýarlar boıynsha ulǵaıdy? Buryn Reseıge eksporttalatyn taýarlardyń saýda kólemi úshinshi memleketterge qazir ósip otyr. Buryn-sońdy mundaı bolmaǵan. Ol taýarlar sol úshinshi memleketterge osyndaı kólemde eksporttalmaǵan bolatyn. Oǵan qosa, úshinshi memleketterge sol taýralardyń saýda kólemi ulǵaıýymen birge, úshinshi memleketterden Reseıge eksport ulǵaıyp otyr», - dedi EO arnaıy ókili.
Sondaı-aq, ol dál osyndaı saparmen Túrkııa, Birikken Arab Ámirlikteri sııaqty birneshe elde bolǵanyn eske saldy.
«Árıne, osy saýda kóleminiń ulǵaıýy sanktsııalardy aınalyp ótýdiń dáleli emes. Biraq, meniń sanktsııalar boıynsha arnaıy ókil retindedegi mindetim sol - úshinshi memleketterge baryp, osy jaǵdaıdy talqylaý, sol memleketterdiń jaýabyn tyńdaý, sodan keıin múmkin bolǵan máselelerdi sheshý joldaryn birge izdestirý. Osy sebepten men kóptegen elge issaparmen baryp júrmin. Mysaly, buǵan deıin Birikken Arab Ámirlikterinde, Túrkııada boldym. Búgin Qazaqstanǵa kelip otyrsam, osy aptanyń aıaǵynda Ózbekstanda bolamyn. Sonymen qatar, mamyr aıynda Serbııa, Grýzııa, Armenııa memleketterine baramyn. Osy issaparlardyń qorytyndysynda eshqandaı saıası sheshim qabyldanbaıdy. Bul meniń sanktsııalar boıynsha arnaıy ókil retindegi qyzmetimniń aıasynda bolyp jatqan saparlar», - dedi Devıd O'Sallıvan.
