Qazaqstanǵa saparmen halyqaralyq paralımpıada komıtetiniń prezıdenti keledi
Halyqaralyq komıtet basshysy aldymen Astanadaǵy zamanaýı paralımpıadalyq jattyǵý ortalyǵynyń jumysymen tanysady. Odan soń, qurmetti qonaqtyń qatysýymen, sondaı-aq, QR Mádenıet jáne sport mınıstri Arystanbek Muhamedıuly, Ulttyq paralımpıada komıtetiniń prezıdenti Qaırat Boranbaev, Astana qalasynyń ákimi Baqyt Sultanov jáne QR Parlamenti májilisiniń depýtattarynyń qatysýymen ótetin kezdesýi josparlanǵan.
Odan bólek, atalǵan kezdesýge otandyq tanymal júzgish Zúlfııa Ǵabıdýllına, Aleksandr Kolıadın sekildi parasportshylar qatysady dep kútilýde.
Kezdesý barysynda Qazaqstandaǵy parasporttyń damýy men ústimizdegi jyldyń shilde aıynda Astanada ótetin para paýerlıftıngten álem chempıonatyn uıymdastyrýdyń daıyndyq barysy qaralady.
Sapardyń ekinshi kúni, halyqaralyq paralımpıada komıtetiniń prezıdenti Endrıý Parsonstyń Úkimet basshysy Baqytjan Saǵyntaevpen kezdesýi josparlanǵan. Onda komıtet basshysy Qazaqstannyń sońǵy jyldardaǵy halyqaralyq arenada qol jetkizgen jetistikteri men elimizde paralımpıadany odan ári ilgeriletý máselesi sóz bolady.
Aıta ketsek, halyqaralyq paralımpıada komıteti álemdik deńgeıdegi barlyq parasporttyq sharalardy ótkizý men basqarýǵa jaýapty. Atalǵan uıymnyń quramyna álemniń 180 ulttyq paralımpıadalyq komıteti kiredi, onyń ishinde bizdiń ulttyq paralımpıadalyq komıtet te bar.