Qazaqstanǵa sapar ońaı bolǵan joq: Mbappe ushaqta túsirilgen sýretke pikir bildirdi

ASTANA.KAZINFORM - Madrıdtik «Real» men Frantsııa quramasynyń shabýylshysy, álem chempıonatynyń jeńimpazy Kılıan Mbappe Chempıondar lıgasy aıasyndaǵy «Qaıratqa» qarsy matchqa – Almatyǵa sapary týraly pikir bildirdi, dep habarlaıdy Kazinform tilshisi.

Mbappeniń Almatyǵa sapary týraly kútpegen jerden pikir bildirýine onyń túrik áriptesi Arda Gıýlerdiń Instagram jelisine júktegen fotosy túrtki boldy. Sýret madrıdtik «Real» mingen Iberia ushaǵynda túsirilgen. Onda shalqasynan jatqan Arda selfıge túsken. Artqy jaǵynda qatty uıyqtap jatqan Mbappe kórinedi.

Kılıan óziniń kútpegen sýretine pikir qaldyrǵan.

- Qazaqstanǵa sapar ońaı bolǵan joq, baýyrym, - dep jazdy Kılıan Mbappe.

Esterińizge sala keteıik, Mbappe Almatyda ótken «Qaırat» – «Real» kezdesýinde matchtyń úzdik oıynshysy atandy. Sherhan Qalmyrzanyń qaqpasyna úsh gol soǵyp, keıin málimdeme jasady. Match 5:0 esebimen Realdyń paıdasyna aıaqtaldy.