Qazaqstanǵa sapa menedjerleri kerek
ASTANA. QazAqparat - Búginde «Standarttaý jáne sertıfıkattaý» mamandyǵynyń oqý baǵdarlamasy eskirdi. Ol - keńestik júıeden qalǵan mamandyq. Búginde sapa menedjerlerin oqytý qajet, dep habarlaıdy QazAqparat tilshisi.
Qazaqstannyń sapa jáne ınnovatsııalyq menedjment uıymynyń basshysy Azat Ábdirahmanovtyń aıtýynsha, joǵary oqý oryndarynyń kóbisi standarttaý men sertıfıkattaý boıynsha maman daıarlaıdy. Al ol mamandyqqa kóp adam bara bermeıdi. Sodan konkýrstyq báseke de qatty emes.
«Eń tómen konkýrs sol jerde, eń tómen bilim de sol jerde. Mektep túlekteri kóp qujat tapsyrmaıdy. Ashyǵyn aıtý kerek, grant úshin baratyndar az emes. Bizge ondaı mamandardyń qajeti joq. Jalpy, standarttaý men sertıfıkattaýdyń qazirgi bilimi zaman talabyna saı kelmeıdi. Joǵary oqý oryndaryna osyny túsiný kerek. Bizge sapa mendjerleri kerek. Al ondaı mamandy birde-bir joǵary oqý ornynda daıyndamaıdy», - dedi A.Ábdirahmanov.
Onyń aıtýynsha, búginde standarttaý men sertıfıkattaýdy oqyp shyqqan mamandardy jumysqa alady. Biraq jumys berýshi kompanııa ony taǵy óz aqshasyna oqytady. Osylaısha, ýaqyt ta, aqsha da kóp ketedi.
«Bilýimshe, «sapa menedjeri» degen mamandyq klassıfıkatorda da joq. Biz ol jaıynda ylǵı aıtamyz. Sapa menedjerlerin daıyndaý qajet. Onsyz bolmaıdy. Negizi, ondaı mamandardy kez kelgen kásiporynǵa alady», - dep atap kórsetti A.Ábdirahmanov.
Aıta keteıik, Qazaqstanda alǵash ret Azııa sapa jelisiniń XVI kongresi ótedi. Oǵan álemniń túkpir-túkpirinen tanymal sapa bilgirleri keledi. Olardyń ishinde japondyq Norıakı Kano, shvetsııalyq Klaes Berlın, professor Moxamed Zaırı, professor Van-Sen Shın syndy sapa menedjmentiniń sheberleri bar.
«Qytaıdan, Úndistannan, Sıngapýrdan, Japonııadan, Ońtústik Koreıadan biraz adam keledi. Biraq, Qazaqstannan adam az tirkeldi. Aıtýǵa da uıat. Bálkim, aqparat jetpeı jatqan shyǵar. Menińshe, bizdiń kásipkerlerimiz aldaǵy kongrestiń mańyzdylyǵyn túsinbeı otyr. Qatardaǵy bir konferentsııa dep oılaıtyn shyǵar. Olaı emes. Kongreste sapa mendjmenti salasyndaǵy biraz máseleler talqylanady. Bıznesti basqarý, óndiristik protsesterdi retteý, sapaly jumysty uıymdastyrý - osynyń bári naqty mysaldarmen kórsetiledi. Máselen, qazir Japonııa, Koreıa sııaqty memleketter sapa arqyly dúnıe júzine tanylyp otyr. Sapa menedjmentin durys uıymdastyrý arqyly qazirgi jetistikterge jetti. Sondyqtan, bizge aldaǵy kongresti barynsha paıdalaný qajet. Otandyq kásipkerlerge ózine qajetti barlyq aqparatty alǵan jón. Sebebi, sapa salasynyń bilgirleri kúnde kele bermeıdi», - deıdi A.Ábdiraxmanov.
Kongress 19-20 qyrkúıek kúnderi Almatydaǵy «Interkontınental» qonaq úıinde ótedi.
