Qazaqstanǵa salynǵan Qytaı ınvestıtsııasynyń kólemi 7 ese artty
ASTANA. QazAqparat - 2016 jyldyń qańtar-qyrkúıek aralyǵyndaǵy Qytaıdan kelgen tikeleı ınvestıtsııa aǵyny 623,9 mln. dollardy qurady.
Bul 2015 jyldyń sáıkes kezeńimen salystyrǵanda 7 esege kóp. Bul jaıynda QazAqparat finprom.kz saıtyna silteme jasap habarlaıdy.
Alaıda keri baǵyttaǵy saýda belsendiligi quldyraý ústinde. Qazaqstannan Qytaıǵa jalpy ınvestıtsııa aǵynynyń kólemi bir jyldyń ishinde 3 paıyzǵa kemip, 2016 jyldyń qańtar-qyrkúıeginde 41,1 mln. dollardy quraǵan.
Qazaqstannyń Qytaıǵa jalpy syrtqy qaryzy 12,3 mlrd. dollar (2016 jyldyń qyrkúıek aıynyń sońy) deńgeıinde qalyptasyp otyr. Onyń negizgi bóligi banktik emes qarjylyq uıymdar men qarjylyq emes uıymdarǵa, úı sharýashylyǵy men kommertsııalyq emes uıymdarǵa tıesili.
Qytaı Qazaqstannyń basty 4 saýda seriktesteriniń biri. 2015 jyldyń sońynda eki eldiń arasynda kólik ınfraqurylymy, saýda, qaıta óńdeý ónerkási, qurylys, aýyl sharýashylyǵy jáne basqa da salalardaǵy yntymaqtastyqtyń klasterlik aımaqtaryn qurý boıynsha 5 kelisimge qol qoıylǵan.
Qazaqstan bul elge azyq-túlikti arzanǵa sata bastady. 2016 jyldyń qańtar-qarashasynda Qytaıǵa jetkizilgen azyq-túlik ónimderi eksportynyń kólemi 115,5 mln. dollardy qurady. Bul 2015 jyldyń sáıkes kezeńindegi kórsetkishten 28 paıyzǵa kem. Elimiz Qytaıǵa negizinen astyq, maıly daqyldar, kúnbaǵys tuqymyn, maı men nan eksporttaıdy. Al Qytaıdan Qazaqstanǵa tsıtýrs jemisteri, qyzanaq, alma, almurt jáne shabdaly jetkiziledi. 2016 jyldyń qyrkúıek aıynyń sońynda Qazaqstannyń Qytaı aldyndaǵy azyq-túlik taýarlary salasyndaǵy mindettemesi nólge deıin qysqardy.
Qytaıǵa mıneraldyq ónimder, sondaı-aq otyn-energetıkalyq taýarlar eksporty kemidi. Bir jyldyń ishinde ol 33 paıyzǵa quldyrap, 2016 jyldyń qańtar-qarashasynda 133 mln. dollardy qurady. Bul saladaǵy negizgi eksporttyq taýarlardyń qatarynda shıki munaı, gaz, kúkirt jáne ken bar. Qorǵasyn keniniń eksport kólemi 4,3 paıyzǵa ósti.
