Qazaqstanǵa resmı saparmen IKAO Bas hatshysy keldi
ASTANA. KAZINFORM - Halyqaralyq azamattyq avıatsııa uıymynyń (IKAO) Bas hatshysy Hýan Karlos Salasar jubaıy Kardona hanymmen birge Astanaǵa alǵash ret resmı saparmen keldi, dep habarlaıdy QR Kólik mınıstrliginiń baspasóz qyzmeti.
Áýejaıda joǵary mártebeli qonaqty Qazaqstan Respýblıkasy Kólik vıtse-mınıstri Talǵat Lastaev qarsy aldy. Bul sapar Hýan Karlos Salasardyń Ortalyq Azııa elderine jasaǵan alǵashqy sapary boldy.
Sapar aıasynda IKAO basshysy Qazaqstan Respýblıkasy Kólik mınıstrliginiń qoldaýymen 20–22 qazanda Astanada ótetin IKAO-nyń Avıatsııalyq qaýipsizdik aptalyǵyna (ICAO Security Week 2026) qatysady.
Qazaqstan alǵash ret avıatsııalyq bılik organdarynyń basshylaryn, halyqaralyq uıymdardyń ókilderin, áýe kompanııalary men áýejaılardyń ókilderin, sondaı-aq
saladaǵy jetekshi sarapshylardy biriktiretin osyndaı aýqymdy halyqaralyq is-sharany qabyldap otyr.
-IKAO-nyń Avıatsııalyq qaýipsizdik aptalyǵynyń Qazaqstanda ótkizilýi jáne uıymnyń Bas hatshysynyń resmı sapary halyqaralyq avıatsııa qoǵamdastyǵynyń elimizge degen joǵary senimin, Qazaqstannyń avıatsııalyq qaýipsizdikti qamtamasyz etý salasyndaǵy jetistikteriniń moıyndalýyn jáne álemdik avıatsııadaǵy ustanymynyń nyǵaıyp kele jatqanyn kórsetedi,-delingen habarlamada.
Іs-shara qorytyndylary jahandyq avıatsııalyq qaýipsizdik júıesin nyǵaıtýǵa jáne zamanaýı qaýip-qaterlerge qarsy is-qımyldyń birlesken tásilderin ázirleýge qosymsha serpin beredi dep kútilýde.
Osyǵan deıin Qazaqstannyń alǵash ret IKAO-nyń Avıatsııalyq qaýipsizdik aptalyǵyn ótkizetini týraly jazdyq.
