Qazaqstanǵa reseılik qantty avtokólikpen ákelýge tyıym salynýy múmkin

ASTANA. KAZINFORM – Aýyl sharýashylyǵy mınıstrligi Qazaqstan aýmaǵyna reseılik qantty avtokólikpen tasymaldaýǵa tyıym salý máselesin qarastyrmaq. Bul týraly atalǵan vedomstvonyń vıtse-mınıstri Erbol Tasjúrekov aıtty.

Ortalyq kommýnıkatsııalar qyzmetindegi baspasóz máslıhatynda tilshiler mınıstrlik ókilinen reseılik qantty avtokólikpen elimizge ákelýge tyıym salý týraly mamandardyń usynysyna qatysty suraq qoıdy.

«Jalpy, elimizde tórt qant zaýyty bar, onyń bireýi qant quraǵyn óńdeý arqyly ónim óndirip jatyr. Qant ónerkásibin damytý baǵytynda jumys istep jatyrmyz, tıisti keshendi jospar qabyldandy. Biraq, qazir reseılik qanttyń baǵasy birqatar sebepterge baılanysty bizdiń elde óndiriletin qantqa qaraǵanda arzanyraq. Sondyqtan ımporttalatyn qant áldeqaıda arzan ekenin eskere otyryp, otandyq qyzylsha shıkizatynan qant óndiretin zaýyttarymyzǵa obektıvti jáne ádil baǵa berý úshin bul máseleni qarastyryp jatyrmyz», - dedi E. Tasjúrekov.

Ol bul másele vedomstvoaralyq komıssııa otyrysynda qaralatynyn aıtty.

«Qazir bul máselemen aınalysyp jatyrmyz, sondyqtan vedomstvoaralyq komıssııaǵa tıisti aqparat daıyndalyp, talqylaýǵa usynylady. Eger bul máseleni atalǵan komıssııanyń barlyq múshesi qoldasa, onda tıisti sheshim qabyldanady», - dedi vıtse-mınıstr.

Eske salsaq, jaqynda Aýyl sharýashylyǵy mınıstrligi Qazaqstan aýmaǵyna bıdaı ákelýge tyıym salynǵanyn málimdedi.