Qazaqstanǵa reseılik mıgranttardyń taǵy bir legi kelýi múmkin be

ASTANA. QazAqparat – SІM resmı ókili Aıbek Smadııarov BAQ ókilderimen ótken brıfıngide Qazaqstanǵa kelýi múmkin reseılik mıgranttar jaıynda pikir bildirdi, dep habarlaıdy QazAqparat tilshisi.

«Men ol eldiń azamattarynyń oıynda ne bar ekenin bilmeımin. Biz oǵan boljam da jasaı almaımyz. Sizder reseılikterdiń alǵashqy legi kelgen kezdegi jaǵdaıdy bilesizder. Kelse, kútip alamyz», - dep jaýap berdi Aıbek Smadııarov jýrnalısterdiń saýalyna.

Eske salaıyq, byltyr 21 qyrkúıekte Reseı prezıdenti Vladımır Pýtın ishinara mobılızatsııa jarııalady.

Osyǵan oraı reseılikter shekaralas memleketterge, onyń ishinde Qazaqstanǵa da jappaı aǵyla bastady.

Qosa keteıik, buǵan deıin Aıbek Smadııarov Qazaqstan men Qytaı arasynda ornaýy múmkin vızasyz rejımge túsinik bergen bolatyn.