Qazaqstanǵa reseılik kadrlar aǵyla ma: Mınıstr jaýaby

NUR-SULTAN. QazAqparat – Qazaqstan naryǵyna reseılik kadrlardyń jappaı kelýi baıqalmaıdy. Bul týraly QR Eńbek jáne halyqty áleýmettik qorǵaý mınıstri Serik Shápkenov aıtty, dep habarlaıdy QazAqparat tilshisi.

«Qazirgi ýaqytta jiti baqylap otyrmyz. Búginde reseılik azamattardyń bizge jumys isteýge jappaı kelýi baıqalmaıdy», - dedi ol Úkimet otyrysynan keıin BAQ ókilderiniń saýalyna oraı.

Sonymen qatar mınıstr mamandardyń jappaı kelýi anyqtalǵan jaǵdaıda Qazaqstan qandaı is-shara qolǵa alatynyn aıtty.

«Qazaqstan, Reseı, Armenııa, Belarýs, Qyrǵyzstan bir ekonomıkalyq odaqqa kiredi. Sondyqtan eńbek resýrstary esh kedergisiz aýysa alady. Bul - birtutas eńbek naryǵy. Qazir de, osy ýaqytqa deıin de olar bizge jumys isteýge emin-erkin kele aldy. Eńbek kúshi jappaı kelse biz ne isteı alamyz? Qabyldaıtyn is-sharamyz – bul jumys oryndaryn monıtorıngileý. ıAǵnı, Jumyspen qamtý ortalyqtary arqyly eń aldymen, ózimizdiń azamattardy jumysqa ornalastyramyz», - dedi Serik Shápkenov.

Mınıstr eń aldymen bolashaqta qajet bolatyn mamandyqtardy aıqyndap alý qajettigine nazar aýdartty.

«Biz jastardyń 40 paıyzyna saýalnama júrgizdik jáne olar ózderiniń mamandyqtaryn tańdamaǵan bolyp shyqty. Reseıdiń nemese Belarýstyń kez kelgen azamaty bizge jumys isteýge kele alady. Sol sııaqty bizdiń azamattardyń jumys isteýge barý múmkindigi bar», - dedi ol.